جريدة الأهرام الجديد الكندية 
مقالات مشابهة
مشهد1
داخلي – حجرة نوم – نهار
تـفتح الكاميرا علي ساعة في يد سماح . سماح فتاة جميلة تنتظر في قلق وسيم صديقها ايام دراستها بكلية الفنون الجميلة والذي سيحضر لخطبتها من ابيها . تنظر من الشباك ثم تعود
سماح
ايه اللي أخرك يا وسيم ؟
بابا كده هياخد انطباع وحش من أولها .
تنظر للسماء
سماح
ابعته يارب بسرعة .
مشهد 2
خارجي – محل الورد – نهار
يظهر وسيم من ظهره وينادي علي بائع الورود
وسيم
ياعم يا بتاع الورد . لو سمحت من فضلك.
يأتي البائع الذي كان يُنسق بعض الورود
البائع
محسوبك جابر أؤمرني يا هندسة .
وسيم
الامر لله وحده . كنت محتاج بوكيه ورد ,
بس مش اي بوكيه . ارخص بوكيه عندك لو سمحت
البائع
حاضر من عنيا الاتنين
يذهب جابر ليحضر الورد
واثناء ذلك ينظر وسيم للساعة ثم يأتي جابر
البائع
ده عشان خاطرك انت بس ب50 جنيه
وسيم
كام ؟؟؟
تظهر علي وسيم علامات الدهشة
وسيم
ما فيش ارخص من كده ؟
2
البائع
ارخص من كده ايه يا هندسة ّ هي الخمسين جنيه بقت بتجيب
حاجة اليومين دول . اشكر ربنا دانا كمان عاملك ديسكاون
شكلك شاب سيس وتعبان .
وسيم
ماشي ياعم انا شاب سيس وكمان عريس
ممكن تديني بوكيه بالعشرة جنيه دي ؟؟؟
البياع
عشرة جنيه ايه ياسيد العرسان يا مقطقط
دي تروح تمسح بها تيييييت امشي ياد من هنا ياد
وسيم
خلاص خلاص ديس كونيكت بقيَ
البياع
وبتشتم كمان بالألافرانكة نهار ابوك تييييييت
تيت تعني انقطاع الصوت .. يجري وسيم
مشهد 3
خارجي _ مقابر _ نهار
منظر علي المقابر . كادر كبير ثم كلوز علي وجه وسيم
ينظر وسيم يميناً ثم يساراً في توجس ثم يسير للأمام . تسير الكاميرا في استقامة وكأنها وسيم وتلف تارة يمين وتارة شمال ثم يمين وعودة خاطفة يسار ثم زوم ان علي بوكيه ورد علي احدي المقابر . كادر كلوز علي وجه وسيم الذي يتلفت حوله في توجس ثم كادر علي البوكية .
مشهد 4
داخلي – شقة سماح – نهار
كادر كلوز علي يد وسيم تضغط جرس الشقة ثم يفتح ابو سماح الباب
وسيم
صباح الخير يا عمي انا وسيم
ابو سماح
اهلا يا ابني اتفضل
يسير ابو سماح امامه للداخل ويذهب وراءه وسيم
3
ابو سماح
ايه اللي اخرك كده يا وسيم ؟
وسيم
معليش يا عمي كنت بلف في المقابر .
يلتفت ابو سماح اليه في دهشة ويقول
ابو سماح
مقابر ؟؟؟؟؟؟
وسيم
قصدي عند جابر . جابر بتاع الورد ياعمي
ابو سماح بعد ان يجلس
ابو سماح
اه جابر . صدقني يا ابني ما كان ليه لزوم تكلف نفسك
وسيم
ازاي بس يا عمي ده اقل واجب
ابو سماح
كُلك واجب يا واسيم يا ابني . هه تشرب ايه بقي شاي ولا حاجة ساقعة ؟
وسيم
شاي يا عمي من فضلك
ابو سماح
اعملي 2 شاي يا ام سماح . اهلا وسهلا
وسيم
اهلا بيك يا عمي
ابو سماح
سماح بنتي كلمتني عنك وقالتلي انك كنت اشطر واحد في كلية الفنون الجميلة
وحكيتلي كمان انهم ظلموك ورفضوا تعيينك مُعيد رغم انك كنت الأول علي الدُفعة
4
وسيم
هو ده اللي حصل بالظبط يا عمي . الظلم مالي البلد والكوسة والمحسوبية
ابو سماح
معليش يا ابني حال البلد مبقاش يسُر لا عدو ولا حبيب احنا محتاجين الضمير يصحيَ من تاني والعدل ياخد مجراه . غياب دولة القانون هوالسبب الأساسي للي احنا فيه
وسيم
تمام ياعمي انا معاك في كل اللي قولته . عشان كده انا عملت مشروع تخرجي عبارة عن ثورة . ثورة ضد الظلم وكان اسمه ( لا )
ابو سماح
اسم مُعبر يا وسيم ( لا )
وسيم
فعلاً يا عمي لا لكل شئ غلط في حياتنا . لا للفساد بكل اشكاله وصوره . لا للتمييز والعنصرية . لا لتقييد الحريات وتكميم الافواه . لا للبلطجة والسلب والنهب . لا لتهميش المرأة وظلمها . …
اثناء ذلك تطل سماح برأسها وتبتسم لوسيم
وهو منفعل وكأنه يهتف في مظاهرة فينظر اليها
وتتبدل قسمات وجهه من الغضب للإنفراجة ويقول
وسيم
لا للحرمان من الرومانسية والجمال
يلتفت ابو سماح ويلاحظ ما يحدث
فيقف ويقول
ابو سماح
لا لا لا لأ . لا للإستغفال والقرطسة . فرمل يا خفيف .
وانتِ واقفة عندك بتعملي ايه ؟ روحي هاتي الشاي ( لسماح )
تجري سماح للداخل
ابو سماح
روق كده يا عم المُناضل وقولي . عملت ايه بعد التخرج ؟
اصل سماح ما حكيتليش كل حاجه وانا احب اسمع منك
وسيم
انا لما لقيت الحكومة اديتني ضهرها . قولت لنفسي
لا يأس مع الحياة ولا حياة مع اليأس .
5
ابو سماح
الله يرحمه ويحسن اليه مصطفي كامل باشا .
وسيم
نزلت ادور علي شغل في كل حته .
ابو سماح
براوه عليك هو ده الكلام . احب انا الشباب المُكافح . طبعاً مكاتب الدعاية
والاعلان خطفوك خطف .
وسيم
بلاش سيرة الخطف دي يا عمي الله يخليك . احنا مش ناقصين .
ابو سماح
معاك حق يا ابني كل يوم نسمع عن خطف بنات . واطفال دول حتي ماعتقوش الستات المتجوزه
والحكومة نايمة في العسل . عسل اسود علي دماغهم كلهم . ربنا يتصرف فيهم . كمل يا ابني
وسيم
للأسف يا عمي . تأتي الرياح بما لا تشتهي السـُـفن . مالقيتش فرصة عمل واحدة
ابو سماح
مممم طبعاً . الاقتصاد واقع والحال نايم عند الكل . واتصرفت ازاي بعد كده يا ابني؟
اوعي تقول يئست . لا يأس مع الحياة ولا حياة مع اليأس .
وسيم
الله يرحمه ويحسن اليه مصطفي كامل باشا .
طبعا ما يئستش وقلت اعمل معرض للفنون بتاعتي
واكيد هبيع لوحات وتماثيل كتير والدنيا هتضحكلي
ابو سماح
ها وبعت حاجة ؟؟
وسيم
للأسف يا عمي . تأتي الرياح …
ابو سماح
بما لا تشتهي السفن . يعني مابعتش حاجة
6
وسيم
ولا لوحة ولا حتي تمثال . بس برضو ما يئستش . عشان لا يأس مع الحياة ولا حياة مع اليأس
ابو سماح
الله يرحمه ويحسن اليه مصطفي كامل باشا . وبعدين ؟
وسيم
قولت اغيير اسلوبي في المعرض التاني من التجريدي للتكعيبي . لكن للأسف ياعمي ..
ابو سماح
ماتكملش . تأتي الرياح بما لا تشتهي السفن .
وسيم
مابعتش ولا لوحة ولا حتي تمثال . بس برضو ما يئستش .
ابو سماح
عشان لا يأس مع الحياة ولا حياة مع اليأس .
وسيم
الله يرحمه ويحسن اليه مصطفي كامل باشا . قولت التالته تابته التجريدي والتكعيبي ماعملش حاجة اجرب بقي الكلاسيكي .
ابو سماح
هو ده الكلام . حاجة الناس تفهمها مافيش احسن من الكلاسيكي
تدخل سماح بالشاي وتضعة علي التربيزة
ثم تضع السكر وتقوم بالتقليب واثناء ذلك
ينظر اليها وسيم مبتسماً ويواصل حديثه
وسيم
وانا يا عمي بموت في الكلاسيكي بحبه قوي قوي اه وحياتك يا عمي . بدوب فيه دوب
ياسلام ع الكلاسيكي وجمال الكلاسيكي وعيون الكلاسيكي ورموش الكلاسيكي
ابو سماح
ايه هو ده . امشي انجري جوه يابت . ماتقعد علي بعضك يا ابني وتتكلم عدل شوية
ايه هو اللي عيون الكلاسيكي ورموش الكلاسيكي !!! المهم بعت ولا ما بعتش
بصوت مرتفع جداً وبطريقة ساخرة وتجري سماح للداخل
7
مشهد 5
داخلي – مطبخ – نهار
تدخل سماح المطبخ ثم تظهر ام سماح في الكادر
ام سماح
في ايه يا سماح ابوكي صوته عالي ليه ؟؟؟
سماح
ابدا يا ماما ما انت عارفه بابا وعصبيته في الكلام
ام سماح
بس كده هيطفش العريس واحنا ما صدقنا ان حد دق الباب
سماح
ايه الكلام ده تقصدي ايه يا ماما ؟ . هو انا وحشة ولا بايرة ؟
ام سماح
يوه يقطعني لا يا بنتي مش قصدي . انا اقصد ان فيه ازمة عرسان عشان
مافيش شغل . الشباب كله بقي عواطلية منهم لله اللي خاربين البلد .
سماح
فعلا يا ماما معاكي حق كل الشباب بقوا عواطلية مابقاش فيه شغل خالص .
ام سماح
وبسلامته بقي بيشتغل ايه ؟؟؟
سماح
بيشتغل .. بيشتغل .. اه اه اه بيشتغل ادمن في جروب كبيررر ع النت
ام سماح
أدمن يعني ايه ؟؟؟
مشهد 6
داخلي – الصالون – نهار
وسيم
يعني ياعمي زي كل مره . مابعتش ولا لوحة ولا تمثال .
ابو سماح
لا يا ابني ده انت كده تبقي فقري . ومنحوس كمان
8
وسيم
ميرسي يا عمي
ابو سماح
طب اقولك ايه يعني ؟ لما 3 معارض وماتبعش فيهم ولا لوحة ولا تمثال تبقي ايه ؟؟
وسيم
معاك حق يا عمي فقري ومنحوس . اظاهر ان مافيش فايدة .
ابو سماح
الله يرحمه ويحسن اليه . سعد باشا زغلول . المهم يا ابني عملت ايه بعد كده ؟؟؟
وسيم
ابدا ياعمي . اشتريت لاب توب وقررت اقعد في البيت . ومن يومها وانا مش سايب النت .
ابو سماح
اه يبقي اكيد عندك خميرة كبيرة معتمد عليها صح ؟؟؟
وسيم
خميرة !! خميرة ايه ياعمي ؟؟؟
ابو سماح
قصدي يعني اكيد عندكم اطيان
وسيم
ابداً يا عمي
ابو سماح
عمارات
وسيم
خالص يا عمي
ابو سماح
رصيد كبير في البنك
وسيم
منين يا عمي دا بابا مديون بفلوس المعارض التلاته
9
يقف ابو سماح وتظهر علي قسمات وجهه
الغضب الشديد , فينكمش وسيم في مكانه
وسيم
في ايه يا عمي مال لونك اتغير فجأة كده ؟؟؟
ابو سماح
امال حضرتك انشاء الله جاي تتقدم لبنات الناس علي اساس ايه بالظبط
لما لا اطيان ولا عمارات ولا رصيد في البنك ولا حتي شغلانه تفتح بيها بيت ؟؟
وسيم
ما انا حَكيت لحضرتك يا عمي . حاولت كتير لكن مافيش فايدة
بصوت عالي وعصبية
شديدة يقول ابو سماح
ابو سماح
الله يرحمه ويحسن اليه سعد باشا زغلول
المهم هتعيش البت منين يا عواطلي يافاشل
يافقري ياوش النحس انت . حقا بطلوا ده واسمعوا ده
وسيم
من فضلك ياعمي ماتقولش عواطلي . انا ادمن اد الدنيا
في جروب قالوا وقلنا وطول النهار عل الانترنت اكتب اشعار
وانزل صور المعارض بتاعتي .
ابو سماح
يامثبت العقل يارب . ياد انت عايز تفرسني ؟ حد مسـَلطك عليَّ
امشي يالا قبل ما ارتكب جناية .
وسيم
بس اسمعني بس ياعمي . اديني فرصة اشرحلك
ابو سماح
يعني مش عايز تمشي بالذوق . طب ايه رأيك بقيَ انا همشيك بعلقة
هاتي المقشة بسرعة يا أم سماح .
يمسك ابو سماح في قميص وسيم
ويبدأ في ضربه وهو يقول
ابو سماح
يا اخي خلوا عندكم دم . هي بنات الناس لعبة
10
وسيم
الحقيني يا سماح
تدخل سماح وأم سماح مسرعتين
ويحاولا فض الاشتباك .
سماح
سيبو يابابا حرام عليك
أم سماح
الواد هيموت في ايديك يا ابو سماح
وسيم
حوشي عني يا حماتي
ابو سماح
حماتك مين يا ابن الفقرية يانحس
وحياة امك لاديك علقة كلاسيكي مُعتبره
يظهر وجه وسيم كلوز من بين الشد
والجذب ومحاولات سماح وأمها تخليصه
من يد ابو سماح . ويقول وسيم بصوت مرتفع
مـُـسـتـَغـيـث
وسيم
سمااااااااااااااااااااح
تمت بعون الله وفضله
ميلاد ثابت إسكندر
فنان تشكيلي واشكيلك
ليماسول في : 25 / 4 / 2013
