جريدة الأهرام الجديد الكندية 
مقالات مشابهة
طفل لم يتعدى عمرة العشر سنوات، وظيفتة عامل صغير بأحد المخابز البلدية، شعر بالجوع أثناء العمل، حاول الحصول على بعض أرغفة من التي يصنعها ويبيعها بنفسه، فراودة عقلة لسرقة 5 أرغفة، إلا أن حظة العثر أن لاحظة أحد عمال المخبز وأخبر مالكه، حتى أمسك به واتهمه بسرقة نفس عدد الأرغفة يومياً،
وسلم صحاب المخبز، الطفل لمركز شرطة الفشن جنوب بني سويف، وحرر محضراً يتهمه فيه بسرقة 170 رغيفا بما يعادل ست جنيهات.
” عبد المسيح عزت” الطفل الذى حكمت علية محكمة جنايات الأحداث فى عام 2013 غيابياً بالايداع فى مؤسسة عقابية لمدة عام، دون علم أسرته أو إخطارهم من المحكمة بإنذار، حصل اليوم الخميس على براءة من نفس المحكمة فى الاستئناف المقدم لها من محاميه على الحكم، وطلب التصالح من صاحب المخبز.
“ابني أخد الأرغفة فعلا بس مسرقش، وهيسرقهم إزاي وابنى بيشتغل عندهم، كل العمال فى ” الفرن” بياخدوا الخبز اللى عايزينة، ودا المتعارف علية فى القضايا دي، هكذا لخصت مريم عيسى، والدة الطفل المتهم قضية ابنها المتهم قائلة : “عمر ما حد عندنا اتمسك فى قضية زى دي، فى الأول من حوالي سنة وسبع شهور، لقينا مركز الشرطة باعتلنا، توجهنا له واحنا مستغربين من الاستدعاء”.
وأضافت:” أول ما دخلت لقيت ابني واقف على جنب اعتقدت انة ضرب حد أوحد ضربة مع إنه في حاله وملهوش فى المشاكل، واستفسرت عن سبب حضوره، أبلغوني أن صاحب المخبز اللى شغال فيه عامله محضر متهمة فيه بسرقة 170 رغيف بما يعادل ثمان جنيهات، استغربنا من الاتهام، وقولناله أكيد انت غلطان وقصدك على حد تاني، لكن (عيد) صاحب المخبز أصر على أقواله، وصمم إن المحضر يمستمر”.
وتضيف والدة الطفل :”سألت ابنى عن سرقة الخبز، رد وقتها انة مأخدش الا خمس أرغفة فقط، وأخدتهم عادى زي ما أي حد من عمال الفرن بياخد الخبز، ولقيتهم حطوا طاولة الخبز كلها على ” تروسيكل المخبز” وحطوني معاة وخدوني على المركز، وبعدها رحنا للنيابة وحد هناك قلنا إن المحضر هيتحفظ ومتقلقوش من أي حاجة بعد ما وكيل النيابة سمع لأقوال الطفل، وقال لة روح”.
وقالت “من أسبوعين فوجئنا بإنذار جاي على منزلنا إن فية استئناف لجسلة عبد المسيح ولما سألنا اكتشفنا إن القضية بتاعتة لسة شغالة واتحكم عليه فيها بالإيداع في مؤسسة رعاية الاحداث لصغر سنة لمدة عام”.
وأضافت:”ذهبنا لمحامي وأخد مننا 1500 جنيها، ورحنا للنيابة والمحامي عمل الاستئناف واتحدد لها جلسة اليوم، واتدخل ولاد الحلال فى الموضوع وراحو لصاحب المخبز واقنعوه بعمل محضر تصالح والتنازل عن القضية، وحضر الجلسة النهاردة وبالفعل اتنازلنا على القضية وحكم القاضي بالبراءة”.
“اشكر الرب على براءة ابني وأخدته معايا للبيت، وخلاص مش هسيبة يشتغل عند حد تاني” كلمات اكتفى بها عزت عزيز، والد الطفل معبرا عن سعادته ببراءة نجلة من تهمة لم يرتكبها.
وقال والد الطفل:” طفل لم يتعد الـ9 سنوات من عمره، ماذا يعلم فى حياته او دنيته عن السرقة، عشان نتهمه بالاتهام دا، أنا على الله عندي حنطور شغال عليه واللى بجيبه بصرفة على ولادي الأربعة، ومش حارمهم من أي شئ”.
وكانت محكمة جنح الطفل (مستأنف الأحداث) قررت برئاسة المستشار فوميل لبيب، رئيس المحكمة، وأمانة سر عبدالعاطي عبدالمجي، تحت رقم 58لسنة 2012 تسليم الطفل عبدالمسيح عزت عزيز 9 سنوات إلى ذوية برفقة طفلين آخرين فى واقعة سرقة الخبز أحد المخابز.
وقررت المحكمة إلغاء الحكم الصادر من محكمة الطفل غيابيا بايداعة دور الرعاية الاجتماعية.
نقلا عن مصراوي
