جريدة الأهرام الجديد الكندية 
مقالات مشابهة
ياريت الأهالي يدعموا ولادهم ومايكسروش بخاطرهم بالتأنيب والمقارانات ويكملوا صراع ويدخلوهم كليات خاصة بطفح الدم واشمعنى فلان أو علان لمجرد نقص درجة أو جاب مجموع قليل
مقدرة جدا تعب الأهالي واستنزافهم علشان ولادهم بس خلاص دي قدراتهم
وعلينا ندخل مرحلة جديدة وكلنا نتعلم من اخطأنا ..الطلبة والأهالي .
المفروض من كل تجاربنا السابقة نعرف أن مش كل من دخل كلية تحت مسمي وهمي أنها قمة
هو إنسان متميز أو هايبقى فيما بعد متميز ..وملايين النماذج عبر الأجيال خير دليل
دا مجرد مجموع بيؤهل لكلية غالبا أنت ماخترتهاش لكن اتربيت على أنك سيادة الدكتور أو المهندس
ومفيش بديل يعني الطالب ماخترش يدرس إيه
بالعكس الطلبة بتدخل كليات مسمعتش قبل كدا عنها ولا بيدرسوا فيها إيه…وقيس عليها كل الكليات
نادرا لما نلاقي حد اختار فعلا .. وبعدين ودا الأهم ماهو المصير بعد التخرج ..تكدس غير عادي لخريجين
الجامعات كلها بلا استثناء بما فيهم الكلية اللي كانت عينك عليها ..كلهم في مواجهة مع ،” وبعدين ”
و هنا بيبدأ الكثير من الشباب يفتش ايه اللي ممكن يعمله علشان ينجح في حياته العملية
والبعض بيكتشف ان ماكان له دراسة الكلية اللي دخلها . القصد مبروك مجموعك
وسواء اجتهدت أو قصرت دا اللي حصل
ادخل الكلية أو المعهد المتاح لك (مجرد وجة نظر ) ..وحاول تستفيد من دراستك فيها في حياتك
حتى لو من باب الوعي والمعرفة ..واثناء دراستك ماتخافش من المغامرة استثمر الوقت كويس أوي
وفكر في نفسك من جديد وعاوز تحقق ايه .ماحدش هينفعك . والخياة مابتقفش عن حد
ومهما اخدت خبرات هاتقضل خبرتك الخاصة هي المحك في حياتك .. حط ايدك على مهاراتك اللي أهملت سنين
ماحدش اتولد من غير قدرات مميزة حتى لو بسيطة .. غير بنفسك طريقة تفكيرك ..(مرينا قبلك بنفس الظروف )
وافتح عقلك وقلبك للحياة ماتخافش ..واتعلم واكتسب ثقافات ومعرفة جديدة حتى لو هاتخد شوية ورش أو دورات
والانترنت عالم مليان كل حاجة.. وعلى ما تيجي تتخرج تلاقي نفسك مؤهل الى حد كبير للسوق فعلا
بنشوف نماذج لطلبة خريج طب وبعدين يكتشفوا أنهم غاويين بيزنس او برمجة ..أو طالب حقوق
ويكتشف أنه غاوي طبخ أو مسرح أو تدريس .. خريج علوم و تجارة ويكتشف من جواه انه بيحب تصميم الأزياء أو التصوير
أو يكون مدرب في جيم أو رسام أو مصفف شعر …او يكون مع أصحاب فرقة للموسيقا .
ليه لا .. ثق في نفسك لأنك فعلا أنت حد كويس .حتى لو مافيش حد بيقولك كدا ..انت مش موجود في الدنيا صدفة ..وانت لسه صغيرين
اوعى تخاف م الفشل .. صدق في مهاراتك وقدراتك وثقافتك لأنها ثروتك الحقيقية اللي بتميزك عن غيرك .
واللي بتواجه بيها اي صعوبة وتدخل الحياة وانت واثق ومرتاح ومن هنا بتحقق النجاح وتفتخر بنفسك
أنت مثلك الأعلى لنفسك ..
