جريدة الأهرام الجديد الكندية 
مقالات مشابهة
بقلم / سهير مجدي
أنا الأم التي انجبت أربعة ابناء منهم بنوته هي أخر العنقود . أنا الأم اللي عرفت تعيش دور الأم والصديقة والأخت والصاحبة لولادها.
أنا الأم اللي وقت اللعب والضحك تبقى أعيل منهم علشان بس تشوف لمعة عيونهم… وتسمع ضحكة قلوبهم.
أنا الأم اللي عاشت عمرها لأسرتها وكان عندها القوة إنها تستغنى عن العالم كله علشان تعمل عالم خاص بيها.
أنا الأم اللي عرفت تربي ولاد يعرفوا يعني إيه أصول أنا الأم اللي بتعرف قيمة الأهداف والطموح وكل كام سنة تروح تدرس حاجة جديدة.. مش بس تجمع شهادات لكن عارفة قيمة العلم في تطور التفكير والإدراك.
أنا الأم اللي حتى وولادها في الثلاثين من عمرهم ومنهم اللي عمل بيت واسرة لسه بتحقق أهداف وبتدرس من تاني.
أنا الأم اللي في الجامعة بيقولو عليها دينمو حياة وبهجة الدفعة.
أنا الأم اللي عرفت تقدم حب وحنان لزوجات أولادها واعتبرتهم بناتها.
أنا الأم اللي متعرفش تكون حماة لكن تعرف كويس تكون قلب يحتوي.
أنا الأم اللي قامت بتربية ولاد تعرف تكون سند لبعض.. وتعرف قيمة كلمة اخوات ، وكل واحد فيهم يقدر بدون تفكير يضحي علشان التاني… في زمن الأخوات بتاكل بعض.
أنا الأم اللي عرفت معنى السعادة لما جوزت الكبير ومن أول يوم مفيش يوم يعدي من غير ما يتصل ويطمن عليها وعلى أبوه عكس ماكنا بنسمع الولاد بتتجوز وبينسوا الآباء.
أنا الأم اللي ولادها لو قالت آه هي ولا الأب يبقى كل واحد فيهم مش عارف يعمل ايه علشانهم.
أنا الأم اللي ولادها عندهم رقم واحد في حياتهم قبل زوجاتهم وابنائهم هما الآباء … الآباء اولآ وبعدهم اي حد تاني.
أنا الأم اللي لما بيخرج معاها حد من ولادها بيعملوها كأنها طفلتهم الأولى … لما يعدي بتاع البطاطا ونعديه بالعربيه ويصمم الإبن يلف الطريق مهما كان طويل علشان يجيب منه لأمه.. ولا لو جاب حاجة في بيته يكون عامل حساب ابوه وامه … ولو قاعد اجازة يطلب اخواته يقضوا معاه اليوم وكأنه أب تاني.
حاجات بسيطة لكن بتحي القلب وتسعد دقاته.
انا الأم اللي ولادها فاهمين يعني إيه عيلة… يعني إيه لمة العيلة.
أنا الأم اللي ولادها لو شافوا واحد فيهم محتاج حاجة فوراً يعلنوا حالة الطوارئ واجتاع عائلي علشان كل واحد يقدم اللي عنده بكل حب.
أنا الأم اللي فخورة بولادها لأنهم فعلاً يرفعوا الراس.
لو اتكلمت عن كل واحد فيهم لا تكفيهم المجلدات.
أنا الحب اللي بيلمع في قلوبهم وعقولهم.
مش المهم إنك تحوش فلوس واملاك… لكن المهم إنك تحوش ولاد يكونوا هما الكنز الحقيقي.. تحوش رجالة بجد… الرجولة مش مجرد نوع…. الرجولة تصرفات ومواقف .
الرجولة سند وضهر وعزوه في زمن ضاعت فيه المبادئ والقيم.
علشان تعرف أنت حوشت إيه شوف ولادك شكلهم إيه … ربتهم إزاي . دفعت فيهم فلوس ولا دفعت حب .
أنا الأم …. أنا رحلة حب
