جريدة الأهرام الجديد الكندية 
مقالات مشابهة
طيب هاكرر ىها لعاشر وألف مرة مرة ..أيوه ماعندناش تنوير في مصر ..اللي عندنا حالة اعتراض من دعاة الثقافة بشكل شخصي على بعض (مش كل ) ما جاء في التراث السلفي العدائي غير الإنساني بالمرة ..
* وتعقيبا على مقالي السابق واللي قبله “هل نجحت حركة التنوير في مصر ؟ ” وغضب منه بعض التنويرين .. وقولت لا ..لأن التنوير اللي يقتصر فقط على جدال متواتر للفكر الديني السلفي هو تنوير غير واعي وغير ناضج ومرتعش ..بل التنوير اللي ما يجرؤ يناقش بحرية قضايا فلسفية ووجودية أو يطرح للنقاش أي فكر جديد
ويدعم الابداعات المجازفة ولو في عمل درامي ويبقى عنده الشجاعة والقوة يبني ثقة بينه وبين الشارع ليخرج بالشعب من ظلمة التخلف والجهل والانسحاق إلى النور والفهم والإدراك هو بلا شك خدعة تسمي بالتنوير اللي للأسف بيقتصر على مجموعة من الأصدقاء لهم نفس المشاركات والاهتمامات
بيسمعوا لبعض ويصقفوا لبعض ويتقابلوا مع بعض و موافقين على آراء واعتراضات بعض بنفس لغة الاستعلاء والتهكم من جهل وتغييب وتخلف الشارع الحزين
طيب سؤال هو التنوير دا مين المقصود بيه ..؟! يعني مين الشريحة المستهدفة ؟!
*طب بزمتكوا دا حال بلد فيها مثقفين ومفكرين وفلاسفة ومبدعين وخلاقيبن أحرار ! ولما حال الشارع يزداد سوء ويتشبث أكتر بأوحال السلفيه الميتة باعتبارها الدين ..يبقا احنا عندنا تنوير ..؟!
*وبعد مادخل بعض التنويرين في أحد تعليقاتي (من وقت ) ليخبروني بأنهم فقط اللي فاهمين التراث وافهمين لغة بعض وعارفين إزاي يلاعبوا مشايخ السلفية..فبلاش إحنا ندخل بتعليقاتنا باعتبار مافيش تنويري مسيحي
يعني دا تراثنا ومشايخنا واحنا حرين مع بعض أولا.. كلامكم صح وفعلا مفيش تنويري مسيحي لأن المسيحي ماعندوش أزمة يعاني منها في كتابه أو تراثه تنكد عليه وعلى عيشته وتنكد على اللي حواليه وعلى بلده
وصحيح أنتو فاهمين التراث السلفي أكتر منا بحكم المرجعية الدينية ( رغم أن الميديا النهاردة وضحت كل شيء )
بس أحنا اللي بندفع تمن التراث ..أحنا أول المتضررين والمستهدفين من فكر السلفية المحرض على تفعيل الكراهية والعنف وأعمال التخريب والتغرير والذبح لمجرد اختلاف المرجعية الدينية ..
أظن كدا يكون رفضنا للفكر المخرب هو من منطلق تضرر حقيقي وشديد ومقصود مش مجرد شو .. وأظن كدا وبنظرة متواضعة للشارع البائس تقدروا تجاوبوا على سؤال مهم ..
هل نجح ما يطلق عليه تنوير في مصر؟ اعلموا جيدا يوم ما يحصل تغيير جذري حقيقي لخلاص وحرية هذا الشعب سيكون تلقائيا من القاع المفروم والمنداس عليه من ضغط السلفية التعيسة ومن سخرية وتعالي دعاة التنوير والثقافة
