جريدة الأهرام الجديد الكندية 
مقالات مشابهة
واحد معرفة بيسألني.. نفسي ابقى حد معروف ومشهور والناس لما تشوفني في ندوة او حفلة تجري تسلم عليا وياخدوني من ايدي يقعدوني في اول صف اعمل ايه…؟ فعشان المنفعة تبقى عامة انا قلت اجاوب هنا يمكن حد يستفيد بص ياسيدي عشان ده يحصل قدامك حل من اتنين
الحل الأول أنك لازم تجرب مرارة السعي حتى تنعم بلذة الوصول ( وده محتاج مجهود وفرهدة وأفكار وانجازات ووقت وصحة وتبقى مستعد وسط ده كله لموجة انتقاد وحروب وشائعات وخوازيق ومؤامرات… الخ الخ )
الحل التاني.. وده السحري واللي مش ممكن يخيب ابدا انت تجيب ( ١٠ الاف جنيه) وتعمل بيهم حساب بنكي
( كده كده هتسحبهم بعدين) وتعمل طلب انشاء جمعية أهلية او خيرية ولو عندك فلوس خليهم ( ٢٠ الف) واعمل مؤسسة تمام لحد هنا…
الخطوة التانية تحضر مناسبات على الفاضي والمليان بدعوة أو من غير.
ومن هنا هتتعرف ع الناس المشهورة قبلك اللي اتشهروا باحدى الطريقتين تمام
الخطوة التالتة ودي الأهم كل فترة تعمل احتفالية انجاز للجمعية بتاعتك مش مهم المناسبة نقول مثلا مرور ١٣٢ يوم على انشاء الجمعية او المؤسسة او تطلق مبادرة جديدة نقول مثلا تسميها ( خليها في سرك) ولو حد سالك بتتكلم عن ايه قوله خليها في سرك ماحدش هيركز اصلا وخلال الحفلة لازم لازم لازم تكرم كام شخصية من المشهورين اللي اتعرفت عليهم في الخطوة التانية.
دروع بقى وشهادات تقدير وصور وخليك فاكر ان ( هناك علاقة طردية بين حجم الدرع وسرعة شهرتك) كل ما الدرع يبقى اكبر شهرتك هتبقى اسرع.
قوم ايه .. المشهورين دول اول ما يروحوا البيت او يمكن وهما لسه عندك هينزلوا صور تكريماتهم بالدروع بتاعتك اللي مشتريها بفلوسك او فلوس تبرعات جمعيتك على صفحاتهم وايميلاتهم وصفحات اصحابهم وصفحات الاكل والشرب والاخبار وهاتك يا شكر وحمد في شخصك وكرمك ومدى المجهود الجبار اللي انت بتبذله لخدمة المجتمع والناس الغلابة والايتام – واتحداك لو مااتعملش معاك خلال يومين كام حوار صحفي ولقاء تلفزيوني وابقي ادعيني وادعيلي.. واعمل حسابي في درع
أحمد العراقي
