جريدة الأهرام الجديد الكندية 
مقالات مشابهة
الدكتور سامح أحمد
بعد سنة من جمع المعلومات عن طريقة انتشار الفيروس ومعرفتنا انه بيعدي اكتر من فيروس الانفلونزا عرفنا ان نقل الفيروس داخل البيوت في الزيارات والتجمعات العائلية من اهم العوامل في انتشار الوباء ومع ذلك لازلنا مش قادرين نحدد بالضبط درجة الخطورة
يعني احنا عارفين ان لو كنا في حفلة عيد ميلاد في بيت مثلا وكان فيه شخص مصاب اكيد فيه احتمال اصابة للموجودين
لكن احتمال الاصابة ده قد ايه؟
سؤال بيجيلي دائما من ناس كانت في حفلة او قاعدين في اوضة او رسبشن واكتشفوا ان واحد من الموجودين كان مصاب وبيبقوا مرعوبين وبيسألوا احتمال اصابتنا قد ايه ؟؟؟
اجابة السؤال ده مش بسيطة لان فيه عوامل كتير بتتحكم في احتمال الاصابة داخل البيوت :
– مساحة الاوضة
– ارتفاع السقف
– دورة الهواء في الأوضة والتهوية من عدمها
– عدد الناس فيها
– الناس الموجودين بيعملوا ايه (واقفين ، بيرقصوا، بيزعقوا ، بيتكلموا ، بيغنوا الخ)
– كام واحد كان لابس ماسك في الموجودين
– التباعد الاجتماعي بين الموجودين
– الفترة اللي اتجمعوا فيها مع بعض
بسبب العوامل دي صعب جدا حساب نسبة الخطورة بالتقريب لان ده بيحكمه معادلات رياضية معقدة لمعاملات الانتشار الفيروسي في مكان مغلق
واخيرا تم وضع كل المعادلات الرياضية المعقدة في برنامج سهل الاستخدام للمستخدم العادي
فقط دخل العوامل المختلفة وهاتطلع لك النتيجة
مثال-١:
– لمساحة الغرفة انا دخلت ٥٠٠ قدم مربع
– لارتفاع السقف دخلت ١٠ قدم
– الناس بيعملوا ايه ؟ واقفين بيتكلموا بصوت عادي
– نسبة لبس الماسك؟ ٥٠٪ من الموجودين لابسين ماسكات
البرنامج طلع النتيجة:
الاوضة في المثال تحتمل عدد ٢ فقط لمدة لا تزيد عن ساعتين بدون اي احتمال للعدوى
لنا غيرت المعطيات وخليت مفيش حد لابس ماسك، في الحال اتغيرت النتيجة وطلع ان احتمال الاصابة هايكون شخص وبعد ٤٥ دقيقة فقط
مثال-٢:
– في حفلة راس سنة بيت مساحته ٢٠٠٠ قدم مربع (٢٠٠ مترتقريبا)
– عدد الاشخاص ٥
– فيه تكييف شغال في المكان
– الشبابيك مقفولة
– مفيش حد لابس ماسك
النتيجة: اول عدوى هاتتنقل من شخص مصاب في الموجودين هاتحصل بعد ٣ ساعات من التجمع
لما زودت العدد ل ١٠ اشخاص، النتيجة اتغيرت واصبحت العدوى هاتتنقل من شخص مصاب في المجموعة الى شخص اخر بعد ساعتين فقط
البرنامج مفيد جدا لو انت بتخطط لحضور حفلة او فرح او حتى زيارة منزلية وهاتعرف اقصى عدد ممكن حضوره في المكان حسب مواصفات المكان والمتغيرات الاخرى
