جريدة الأهرام الجديد الكندية مقالات مشابهة
بقلم / ماجدة سيدهم
(كورونا العاهرة )
إيه اللي وصل الغالبية من العامة في مجتمعنا المطعون بالجهل والتخلف وخصوصا بين كتير من الستات أنهم يتعاملوا مع الكورونا باعتبارها ست شمال..واللي يقرب منها تتلط سمعته بفضيحة وكأنه اتقفش مع الفيرس في بيت دعارة .. او أن الكورونا دي
هي العفريت او الجنية اللي بتعور البنات قبل ليلة دخلتهم الفخيمة وتبقى فضيحة ..
ببساطة ودا من وجة نظري
الفيرس دا ارتبطت الوقاية منه بفكرة التباعد ..وعدم التلامس أو عدم المخالطة لأي مصاب.. لأن دي سكة اللي يروح مايرجعش..
واحنا كستات في عرف مجتمعنا الموبوء بحسن السير والسلوك بتكون فكرة التباعد دي مرتبطة جدا بسوء السمعة..
يعني احنا لا بنقرب ولا بنخالط ولا بنكلم أي حد سمعته سابقاه نجس يعني ..ولا نتعامل حتى مع عيلته ..
م الآخر لطة الكورونا في مفهومنا وعرفنا الشعبي بالظبط زي لطة العاهرة .. ..علشان تحمي نفسك منهم لازم تبعد عنهم
ومايفرقش معانا إن كان الفيرس دا مرض ولا لأ…لو عملتوا مليون حملة توعيه هو كدا .. فأي حاجة لازم نخاف منها ولازم نبعد عنها احسن نتنجس ونموت يبقى ضروري هي تخص الشرف
ويمكن دا اللي بيفسر رد الفعل الهيستيري لكتير من الستات لو واحدة منهم أو أي حد من أسرهم طلعت نتيجته إيجابي..يعني اتقفش مع كورونا والتهمة لابساه لابساه ..
فاكرين زفة الفضيحة البلدي في هجوم نسواني عالمي على جثمان الدكتورة سونيا ضحية كورونا .
طيب فاكربن الطبيبة اللي أصر جيرنها يطلعوها برا العمارة لمجرد إصابتها بكورونا . .
أما بقى لو طلعت النتيجة سلبي يبقى بالظبط ربنا سترها وتطلع الحالة زي الخضرة الشريفة ..براءة براءة ..وهوس الزغاريد والرقص النسواني المأڤور وإيحا ءات وضيعة علشان الشارع كله يشهد على نضافة سمعتنا والمنديل بدمه أهو ياظلمة ..سلبي سلبي ..وماحدش يقدر يقفشنا ولا ديمسك علينا حاجة ..
دا بصراحة نتيجة جهل اللى اتربينا عليه. بأن اي شيء من وراه مشاكل ووجع دماغ ولازم نبعد عنه هو بالضرورة مشبوه ..
طيب نسمع كدا بعض التعليقات انا سمعتها بنفسي .
:” ياسوادي ..والنبي يا أبلة ماتجبيش سيرتها أدامي ..”
أ و واحدة تشد طرف العباية وتف في عبها “تفت تف تف..أعوذ بالله من دي نجاسة ..”
او ” لا كله الا كدا.. إحنا يا أبلة ناس في حالنا وبعيد عن المشاكل والكمامة وااح انتي أهم في جيبنا على طول “
بس كدا ..وكل شرف وقاع المجتمع بخير ..
