جريدة الأهرام الجديد الكندية مقالات مشابهة
بقلم / ماجدة سيدهم
(مع احداث مصرع طفلة بأسيوط جراء عملية ختان)
مافيش داعي للانزعاج ….دي مجرد حالة وماتت ..عمليات الختان ماشية زي الفل على ايد دكتور البلد وعلى إيد داية القرية كمان …عادي جدا ..وللعلم الأمهات والجدات والخالات والعمات حريصين جدا على ختان بناتهم ..ولو ماتت ألف بنت. فيه غيرها الآف مستنية في طابور ختان أطول من سنين قهر وجهل وتخلف
يابلد المهابيل وعلماء النكاح والمفاخدة والاستمناء .. ياوطن معكوك في روث مفسرين أحوال الجن والغلمان وأكل الزوجة والغزوات والترويج للاغتصاب . يابلد فرمها السعار. وخربها وباء الهوس بجسد الستات ..بس مايفوتكوا آذان ..
مليارات بتروح لمؤتمرا ت كلها فاشلة ..ومافيش حملة واحدة فلحت في توعيةشعب غرقان في الجهل ولتجريم الختان او التحرش او منعت زواج الأطفال أو كثرة الانجاب… اين أصوات حقوق المرأة ..ولا الصوت مش عورة وقت الانتخابات بس
اللي عمل عملية الختان دكتور بعقل متخلف.. دكتور يعني كلية قمة بيتصارع عليها الآف الطلبة ..أي مستقبل إذن وهي دي العقلية اللي بتعطي قرارات
الفشلة بياخدوا قرارات فاشلة لأن اختيارهم لمواقعهم أصلا وصولي وفاشل ..
من المسؤول ومن نحاكم هنا ..؟ وهل فعلا سننتبه ..مش قصة تعليم دي حكاية وعي وثقافة والنتيجة شعب كله متختن من الحياة والمستقبل ..
كل ختان وانتم عرايا
