جريدة الأهرام الجديد الكندية مقالات مشابهة
بقلم / ماجدة سيدهم
اقتراح الغرامة على الملابس غير المحتشمة اقتراح ذكوري كوميدي غبي شويتين ..لأنه بيتصور أن لسة عندنا ستات بتلبس .. دا لو لسه عندنا ستات أصلا .. وايه هو اللبس المحتشم غير النقاب. ؟ لأنه الوحيد اللي أسود و حتة واحدة .. ولو افترضنا انه حايطبق.. ودا مش حايحصل.. لكن حايطبق على مين بالظبط ..؟
طيب خلينا نتفق أن اللبس المنتشر بين أغلب الصبيات مبتذل فعلا رغم الحجاب .. يعني هو يادوب بنطلون حايتفرتك على كام بادي محزق فوق بعض ..وكوم ايشاربات ملونة على الجمجمة.. دا غير طريقة المشي ..
لا أناقة ولا رقة ولا جمال.. يعني لبس لا يليق بأي أنثى خلقة ربنا ..الابتذال دا ياسادة نوع من الرفض الشديد والتحدي والثورة على الكبت اللي خنق الناس وقتل فيهم الإخساس بأنهم بشر طبيعين .. وهو دا اللي حايفرتك المجتمع قريب جدا ..ماتستعجلوش ..
*ماعلينا كنت اتصور غرامة هائلة على اللي يخالف قواعد المرور مثلا. أو يتسبب في ضجيح الشوارع أو على مكبرات الصوت ..أو غلق الصيدليات في مواقيت الصلاة وتعطيل مصالح المواطنين بحجة الصلاة .. أو اعمال العنف والتحرش والاحتيال المنتشرة .. القاء القمامة و البصق والتبول علنا ..الكتابة على الاسوار والجدران .. استغلال أطفال الشوارع أو الاغاني الهابطة والأفر اح الشعبية المزعجة والكلمات الخادشة للحياء .. أو .او .. شارعنا مكدس بالسلبيات. ..كل دا ما لفت نظركوا ولا انتباهكوا
الغرامة اللي بجد هي على اللي كان السبب في قتل الجمال والتحضر وحطم الذوق الراقي والتهذب بشوارع المحروسة زمان .. على كل من دعم و ساهم بخبث في نشر القبح والقذارة والفوضى والبلطجة ..على كل من ساهم بفكره وجهله في قتل ستات مصر واغتيال عقولهن و انوثتهن ..
وبعدين نرجع نسخر من ستاتنا ونقول لبس حشمة ..لو ما كان دا اقتراح كوميدي لكانت الغرامة الفادحة من نصيب صاحبة الاقتراح ..
