جريدة الأهرام الجديد الكندية مقالات مشابهة
بالصدفة مشهد من برنامج دنيا الخير عن فتاة جميلة جدا تبكي بخجل وحرقة بتطلب تسديد ديون لأبيها .. وعليه عرض مقدم الحلقة بشوية حنية يقطعوا القلب يطلب من المشاهدين دعم هذه الأسرة المسكينة لمرضاة الله
كل دا تمام .لكن اللي مش تمام خالص وما انتبه له حضرته ولا اي اعلامي أو فنان أو شيخ غاوي شو ..البنت الجميلة وهي بتمسح دموعها بتقول :(صحابي في المدرس بيضحكوا ويتريقوا عليا لاني بألبس هدوم من واحدة صاحبتي معايا ف الفصل ..)
ياحضرات المؤمنين المبتسمين والمرتاحبن .. ابوس ايديكوا كفاية تجارة وشحتفة وشحاته على حساب كرامة البسطاء .
. تسديد الديون مهم .. لكن الأهم ستر وتسديد عوار هذا المجتمع العاري من الأخلاق والتربية والقيم..مجتمع لابس الانحطاط والسفالة والجوع والبلطجة والشماتة
علموهم أن لما تعطي أعطي بحب وستر ..وإن الإحسان والبر اللي فلقتونا بيهم ليل نهار مش همة شوية الفلوس ولا شوية الهلاهيل ولا حتى شوية الرز مع حتة اللحمة ونتصور جنبهم كمان ..شو يعني..
علموهم أن أكبر إثم يحزن قلب الله انك تتريق وتذل فقير أعطيته باليمين وترجع تسخر منه بالشمال ..
.علموهم أن فيه قيمة اسمها العيب والحرام ..حرام أشاور على عورة غيري لأنه بيجلب اللعنة .. عيب وحرام اسخر من زميلتي اللي لبست من هدومي ..وايه المانع أني ما أعلق خالص حتى لو فكرتي اقولها تحفة عليكي حايكل منك حتة .. دا حتى الكلمة المفرحة صدقة ..
حرام اكسر نفس طفل أو شاب أو رجل مد ايده وأكل ولاده وأفكره بطريقة غير مباشرة إني صاحب فضل عليه ..وإن أي عطاء نقدمه حتى لو كلمة من غير حب أو ستر هو خطية محزنة ..
خطية ما أحضن صاحبي أوصاحبتي أو جارتي البسيطة وأنبذها وأهملها في مناسباتي ..
جرعات الدين اللي طفحتوهالنا مافيهاش أي قيمة أخلاقية واحدة .. حرام عليكوا ياكائنات برا الإنسانية
..طلعتوا أجيال وحشة جدا ..رديئة جدا .. بلطجية وأنانية وكدابين ونتاشين وكارهة حياتها وحاقدة وصدقوا فعلا أن ربنا سهل جدا ترشيه بقرشين .. !
اللعنة على كل صاحب كلمة تاجر بعوز الفقراء وساهم بجهله في نشر الطبقية والكراهية والانتقام بين الناس ..
