جريدة الأهرام الجديد الكندية 
مقالات مشابهة
بقلم الدكتور شريف السركى
في ندوة يوم 9 فبراير 2018 .. التى عقدت في برتاوي مقر مؤسسة كمة وحضرها عدد كبير من المهتمين بجدية بموروثنا الحضاري والفكري .. فاجئنا الباحث الكمتي طارق حسان بنظرية مذهلة عن أصول الحضارة الإنسانية سماها نظرية البريوش.
البريوش للي مايعرفوش – زي حالاتي كدة – أكلة فرنسية بتتعمل بالعجين اللي بيوضع قطع متجاورة فبتتداخل مع بعضها بطريقة جميلة جدا وتصنع شكل مميز بيسموه أحيانا عجينة خلية النحل.
نظرية الباحث الكمتي طارق حسان بتعتمد على ملاحظة إن الأبنية العظيمة في أنحاء مختلفة من الكوكب كلها بتحمل صفة البريوش وإن التداخل بين الصخور فيها لايمكن يكون شئ طبيعي .. من كدة إستنتج إن الاحجار دي مصنعة بتكنولوجيا متفوقة جدا مانعرفهاش .. وإن التكنولوجيا دي كانت معروفة للبشر في جميعا أنحاء الكوكب بنفس الطريقة.
من هنا وصل الباحث لإن الحضارة الإنسانية في الأصل واحدة وإنه لسبب ما إنعزلت في أماكن متفرقة ونشأ التباين بين الأمم رغم الأصول الواحدة. المهم في الموضوع إن الأصول دي ماكانتش بدائية ولا حاجة .. كانت أصول متفوقة جدا وعلمية وحضارية وغالبا كمان فكرية رائعة.
من شوية أنا نزلت النهاردة رابط لمقال عن التشابه بين حضارة أجدادنا وحضارة الإنكا في أمريكا الجنوبية. المقال الإنجليزي بيقول فيه الكاتب إن العلماء تعمدوا يتجاهلوا التشابه الرهيب بين الحضارتبن لانهم تحت ضغوط عالمية تدعونا للإعتقاد بإن الحضارة الحالية في العالم هيا أفضل مايمكن تخيله وإن العالم القديم كان بيشهد حياه متخلفة غبية. الكشف عن التواصل العالمي في العالم القديم والحضارة الراقية المتناثرة في الكوكب كله مش في صالح اللي بيروجوا لفكرة إن العالم حاليا في أبهى أحواله.
فكرة إن العالم وصل لأفضل أحواله بتخدم غرضين مختلفين .. الغرض الاول عقائدي بيحاول يوهمنا إن الفكر الديني الطاغي حاليا كان السبب في النعمة اللي العالم فيها على غير الحقيقة لان التقدم العلمي في الغرب بدأ مع إنفصال الحياه المدنية والعلوم الطبيعية عن سطوة الدين وبالتالي فالأديان السائدة حاليا كانت بتعرقل التقدم والتحسن في كيفية الحياه مش بتدعمهم. ا
لغرض التاني سياسي بيحاول يوهمنا إن قيادة الغرب للعالم كانت السبب في النعمة اللي بقينا عليها وده برضه إدعاء كاذب لان الويلات اللي العالم عاشها من الغرب بسبب إنهيار الفضائل والقيم الأخلاقية كان تأثيرها السلبي أكبر بكتير من شوية المظاهر الحضارية اللي لقطها سكان الكوكب من الغرب.
أنا مش عارف البريوش في ذهن الباحث الكمتي طارق حسان بيقصد بيه التدخل في الصخور فعلا كدليل على صناعتها بدلا من شغل المحاجر التقليدي .. ولا هوة عمل زي أجدادنا وبيرمز بالبريوش لتداخل وتلاصق وتشابه حضارات العالم القديم كدليل على إنها من ماعون واحد ؟؟ أصلنا كمصريين بنحب جدا موضوع الترميز ده وبنشوف القيم العميقة في الحاجات الظاهرية
