جريدة الأهرام الجديد الكندية 
مقالات مشابهة
بقلم سامى غازى محمود
رمضان فى الغربة إنك تنام شوية بعد العصر عشان ترتاح من الشغل قبل ما تقوم تحضر الفطار ، تصحى تلاقى نفسك نص الليل عشان مفيش حد يصحيك ..
رمضان فى الغربة إنك تشتري عصير و انت مروح ، و تصب كوباية ساقعة قبل المدفع بثواني
و لما المغرب يأذن تكتشف أن العصير ده بيتخفف بميه ، و ما بيتشربش كده .
رمضان فى الغربة إنك تحضر طبق واحد تفطر بيه بعد ما كان ما بيعجبكش العجب
و تفضل تتفرج على الطبق لغاية ما المدفع يضرب تلاقيك بتأكل لقمتين بس
و تشبع و تقول الحمد لله .
رمضان فالغربة لما تبقى شامم طبيخ الجيران
ومفيش حواليك حد تقول له نفسي في الصنف ده أو ده .
رمضان فى الغربة لما تشتري الكنافة و القطايف و أنت مروح
و تفتكرهم تاني يوم الصبح لما تلاقيهم على الكرسي اللي جنبك في العربية .
رمضان فى الغربة لما يادوب تبدأ تفطر
و تلاقي باقي كراسي السفرة فاضية ، فتولع سيجارة و تقوم .
الغربة أقسى ما تكون ….في رمضان
