جريدة الأهرام الجديد الكندية 
مقالات مشابهة
كان يوم معدي من أوله عادي
كنت قاعد جوه نادي
بطبعتي هادي
او كنت ماشي
مش مهم ومش أساسي
ولقيتها جايه قصادي ومعديه
لِسَّه شايفها انها من ربي
أغلي هديه …..
كانت بعيد…..
وانا نظري اصله كان بعافيه
هي جايه اكيد وشايفه
هي عارفه
ان ده وقتي ومكاني
اللي بكتب فيه الاغاني
قمت باصص جوا نفسي
علي وشي نظرة فيها آسفي
ولميت ف ورقي
بطريقة بخفي فيها قلقي
و لمعت ساعتي
كالعادة واخدت نص وقتي
من يوم ماجت وجابتها ليا
عمرها ما فارقت ايديا
كانت خلاص دخلت مجال مرمي البصر
حكم القدر
احس بيها قبل أما أشوفها
كنت يوم سبب ف خوفها
فايديها شنطه فيها بعض حاجات
فكرتني بزكريات
كان عيد ميلاد
شادي وآيات
ولقيتها جايه جايبلهم هديه
وجايبه معاه الساعه ديا
كان يوم جميل
وقلبي كان قرب خلاص هيطر
جمال شعرها كان بيغازل التفاصيل
لسّاه مازال اجمل ما كان بكتير
عدت قصادي
وكأنه ولا كان!!!
سرقت مشاعري وباعتني بالمجان
والصدمة كانت
وقت اما مالت
وسلمت عليه
من كسفتي فضلت باضحك واضحك واضحك
ضحك هستيري
جالي يوم ولقتني من غيري
وكأني دخان خارج من فنجان فيه قهوة
تأثيرة واضح بس مش ملموس
أصبحت واقع لكنه مش محسوس
والغريبة !!!
إنها لِسَّه بريئة
لا حبي ليها باين عليها
ولا جرحي فيها دبّل عنيها
وهو قاعد ماسك ايديها
حسرتي بانت عليها
والمشهد بقي أشبه بشئ تراجيدي
كانت حته منها شابكة ف وريدي
كانت ساعة باين
كل اللي كان هاين
عليا نفسي ساعتها
سابتني ليه سارح ف غربتها!!!
نظرات ورغبات وهمسات كانت ملحة
مصدرها كان
كل اللي كان حواليا
والأرض كانت
شابكه فرجليا
قمت قاعد
مفيش مُساعد
يخطفني من اللي انا فِيه
مالك يا بيه ؟؟!!
كان صوت ساعتها
لعامل البوفيه
بعد التحية وبعد السلام
فات الأوان علي قعدتك
ايه اللي شتت فكرتك ؟!!
بصت له وانا مزهول
كل اللي كان معقول
صبح
خارج نطاق القول !!
والحزن متزايد
صديق معايا ف كل يوم
برفانه كان شوك هموم
رسم حكايته
فكل تجعيده ف ملامحي
حتي جرحي
مسلمش من سِمه اللذيذ
أكيد دي رغبة فالهروب
من كسفة كانت وقت الغروب
واهرب لي مني وقت اما بضحك
من وقتها وانا لِسَّه باضحك
كلمات :د/عبدالرحمن السموري
