مدحت عويضة يكتب : فاكسات مهاجر
11 أبريل، 2016 مقالات واراء
السيسي
خيبة أملك في المسئولين المصريين بيفكرني بييت الشعر “يا بلدنا فيكي حاجة محيراني كل ما نزرع القمح في سنين يطلع القرع في ثواني”.
محلب
شكرا لك علي حل مشكلة دير وادي الريان, لكن الحل لن نرضي عنه قبل الإفراج عن الرهبان المحبوسين ظلما. سفير مصر بروسيا روسيا تعلن عن تأجيل عودة رحلاتها لمصر بعد خطف الطائرة. وسيادتك تطلع تقول الحادث لن يؤثر علي عودة السياح، هنتعلم نبطل كذب أمتي بقي؟؟.
أيمن نور
مقابلاتك لرجال من المخابرات الأمريكية في تركيا فكرني بعم أحمد نجم لما قال الرجولة مش الذكورة وجميلة إسماعيل أرجل من أيمن نور.
فاطمة ناعوت
أهلا يبكي يا صانعة الفرح في أرض كندا كلنا متضامنين معاكي ضد أي حكم يصدر ضدك وزي ما طول عمرك بتدافعي عننا جه الدور علينا نرد جزء صغير من جميلك.
وزيرة الهجرة
قبل تعيينك وزيرة كان المصريين بالخارج أكثر توافقا مع الحكومة المصرية أنتي عملتي زي إللي جه يكحلها عماها.
محمد رمضان
بصراحة استويت وقمعت وحلويت في سن صغير جدا ربنا يسترها عليك من الغرور.
أحمد شيبة
غنيت أه لو لعبت يا زهر أهو لعب يا أخويا وإللي مسافر من اسكندرية للقاهرة لقي نفسه في قبرص.
وزير الدفاع الكندي
تركت مؤتمر صحفي علشان تجيب بيتزا للعيال، يا راجل رد علي أسئلة الصحفيين وأنا أدفع تمن الدليفري من جيبي لمحل البيتزا.
جاستن ترودو
أنا لا هسألك عن الاقتصاد ولا البطالة ولا حرب داعش أنا بس قلقان “السيلفي” قل كتير ليه طمنا عليك وحياتك.
هشام جنينة
الفساد هو الأقوي في مصر والدليل إقالتك وهيفضل الأقوى ومافيش فايدة خد فيزا لكندا وتعالي وريح دماغك.
سمير غطاس
بتقول يتم اختيار نواب لسفريات الخارج ما بيعرفوش انجليزي، انجليزي إيه إللي لازم يعرفه كفاية أنه بيعرف يمشي مصلحته.
ميسي
تبرعت بحذائك للأعمال الخيرية في مصر بهدلوك لو اتبرعت بيه لإسرائيل كان نتينياهو بعتلك برقية شكر لو للهند كانوا عملولك تمثال.
جريدة الأهرام الجديد الكندية 
