جريدة الأهرام الجديد الكندية 
مقالات مشابهة
– مفيش حاجة اسمها #كيف_حالك و تروح تسلم على صاحب الكشك و تقوله يا هلا.
و انت فى الكشك متفضلش تدور على عصير المراعى و الربيع … فوق انت فى مصر في جهينة و مفيش تصبيرة.
اياك تقول لحد عندك صرف اسمها فكة.
عملة مصر هى الجنية … اوعى تتلخبط و تقول بكم ريال ساعتها اللى شغال هيشتغلك
و هتدفع بالريال بجد.
انت نازل شهر بلاش تبقي تقيل …. صحابك عندهم شغل فى مصر و حياتهم متلخبطة.
بلاش كلمة #عندنا_هناك اللى بتبدأ بيها جمل كتير زي مثلاً (عندنا هناك فيروز و بيريل اسمه بيرة ) و تفضل تضحك ، اصحابك هيضحكوا مجامله بس اللى جواهم ممكن يزعلك.
فى ناس كتير بتوهمك ان مصر خرابة و انت جاى فاكرها جنة و هى ولا جنة و لا خرابة هى مصر اللى انت سايبها من كم سنة عادى يعني #عسل_اسود.
موسم التزاوج بلاش تروح كل الافراح و تضيع اجازتك .
بلاش تتكلم عن امكانيات الخليج الفتاكة انت مجرد مقيم متمثلش.
بلاش تقفش على الناس اللى بتتريق على #كرشك ، لانه فعلا كبر عن السنة اللى فاتت.
الاسئلة من نوعية ( هنفرح بيك امتى و مفيش حاجة فى السكة و مش ناوى تخاوى ابنك) دى اسئلة سخيفة بلاش تفضل تسألها للناس من قبيل العشم.
#العشم صفة وحشة بلاش تتعشم ان الناس مبتتغيرش و انهم هيخدموك عفو مل حاجة شان انت نفسك اتغيرت.
انت مش سايح بلاش تتوهم ان في حد عايز يروح الاهرامات و يركب خيل او يتصور سيلفى عند القلعة او يشم عبق التاريخ فى خان الخليلي. – الاغانى الخليجية مش بتعجب المصريين بلاش تجيب سيرتها.
عربية الفول حلوة بس بلاش زيطة الناس بتأكل منها عشان تعيش مش من انواع الفولكلور و افتكر أنت مش سايح .
اهلك ليهم حق عليك بلاش تنفض لهم و تركز مع صحابك.
حاول تسيب ذكرى حلوة للسنة الجاية بدل ما الناس تعد الأيام على انك تغور.
متتخضش لو لقيت ستات لابسة الوان مش عبايات و سايقة عربية دا امر لا يحرمه القانون فى مصر.
و انت بتشترى من محل و عايز تعمل #سايح بلاش تقول هو في هنا شبكة و لو فهم انك قصدك تدفع بالفيزا و قالك لا مفيش بلاش تقوله طب فين اقرب صراف.
الفول اسمه فول برضو بس الفلافل اسمها طعمية فى مصر.
بلاش جو السايح و تقول لصحابك انا بشرب بيرة هوليستن دي بيرة من غير كحول يا بابا .
احذر من ذكر هذه الكلمات: ملحمة و مقصف و يسار و ادعس
العروسة بتروح قبل الفرح الكوافير مش مشغل.
مينفعش تقول ” انا نازل اجيب دجاج من التموينات و جبن و بريال خبز .
عارف الفاكهة اللى من برة اخضر و من جوه احمر و فيها بذر مسمهاش حبحب على فكرة.
شركة بيبسى فى مصر بتقدم ميريندا بطعم البرتقال او التفاح لو حد سمعك و انت بتقول ميريندا حمضيات هتزعل جامد انا بقولك اهو .
و انت بتطلب ميريندا لا مؤاخذة حمضيات و افتكرت انك عايز كارت لجوالك اقصد لموبايلك لازم تفتكر ان الشركات فى مصر هى موبينيل و فودافون و اتصالات بلاش تدخل و تقول كارت موبايلي تلاتين لان مفيش شركة اسمها موبايلي فى مصر و مفيش كروت تلاتين اصلاً.
كل يوم فى مصر بتطلع كلمات جديدة و الناس بتستخدمها اشطة يا باشا فبلاش شغل الانبهارات لما تسمع كلمة جديدة زي (انتش او اخيطة و لا كاورك…..) و تقول ” ياه دا انتوا المصريين شعب مسخرة !”.
انت مصرى بلاش تحسسنى انك اتحرمت و انت عايش فى لوس انجلوس من رؤية برج القاهره و اكل الترمس على الكورنيش و تركب فلوكة و تستمتع بالنهر الخالد.
المحارم كلمة لن تخطر على قلب مصرى انها هى المناديل او كلينيكس او tissues.
متستغربش لو لقيت مكانك على السفرة فى بيت اهلك اتاخد … انت عند الناس #ضيف و عند نفسك ابن البلد .
لو راكب عربيتك و دخلت على لجنة فى مصر اطفى نور عربيتك عشان الظابط ميستقصدكش عشان مولع النور في عينه.
حاول تتمالك اعصابك و اوعى تهرب لو سمعت صوت الاذان و انت فى مصر و بتأكل فى مطعم … محدش هيطردك و لا يقولك #سكر_يامحمد صلاة.
بمناسبة #سٓكِر متستهدمهاش احسن عشان شرحها هيطول.
كلمة #حبة معناها فى مصر شوية فبلاش يا عم الخليجي تقول للراجل اعطنى ٦ حبات صن توب !! … صحيح مفيش صن توب فى مصر اصلاً.
ممنوع وضع رجلك على تكيف العربية كنوع من التهوية او الترويش.
بص يا عم الثرى العربي و انت فى غربتك ممكن ترخم على اللى شغال فى محل اعتقاداً منك انه ملوش سلطة او عامل و خلاص ….. بس فى مصر ممكن ترخم على حد فى المحل هيطلع فى الغالب ابن صاحب المحل او صاحب المحل نفسه و ساعتها هتندم ايها الثرى .
بلاش يا عم الثرى لو عيالك كسروا حاجة في مكان او بهدلوا الدنيا تطلع بالكلمة الشهيرة #بكم_يعنى … وتقول هدفعها عاادى و البق التعبان دا .
بمناسبة الاحداث بلاش تنبهر لما تشوف ماركة مش متعود تشوفها فى مصر او مكان و تطلع بالجملة السخيفة ” ايه دا هو ايكيا فتح فى مصر !!!!” كلنا عارفين ان الشوارع فى الخليج اوسع من مصر و العربيات اكبر عشان كدا لما بتنزل مصر بتشوف الدنيا اصغر شوية …. بلاش اوفر و تسمعنا الكلمتين دول كل سنة . –
لو لا قدر الله تعبت و انت فى مصر و روحت لدكتور بلاش تقوله اكتب لى وصفة ما يكونش فيها تحاميل لانه فى الغالب هيفتكرك من داعش قوله برشام و لبروس و روشتة عادى يعني ( انت مصرى ).
بلاش اسئلة هى ملهاش اجابة من نوعية ” هى الاسعار بقيت غالية فى مصر كدا ليه ؟! ” مش لازم تظهر التحدى بتاع كل سنة فى درجات الحرارة لما حد صاحبك يقولك الجو حر اوى النهاردة ، تقوله( هو دا حر يا عم تعالى شوف عندنا درجة الحرارة حاجة و خمسين و عايشين عادى )…، الخليج مجهز و البلد كلها مكيفة متصعش.
طبعا لو دخلت على حد بثقة و قولت له اروح التشليح ازاى .. فى الغالب هيشلحك او هيفتكرك لامؤاخذة شمال.
و لو سألت على الوكالة فين هيخدوك وكالة البلح مش توكيل العربية
عمرك ما هتعرف توصل للحراج فى مصر … لانك هتتشيع على الجراج – طبعاً نفسك تاكل فى ام_حسن عشان متغرب و نفسك فى اكل مصرى… عيش عيشة اهلك الملوخية بتتاكل فى بيتكم .
لو ربنا كرمك و عجبك محل اوعى تروح و تسأل ( لو سمحت هو المحل دا #للتقبيل ؟!) …. انت كدا هيطلبولك بوليس الاداب مش هتأجر المحل .
صحيح عشان منساش و انت داخل كرجل خليجى #ام_حسن مفيش حاجة اسمها ايدام .
و لما تحكى لصحابك انك كلت فى #ام_حسن متقولش دول عالم #على_بابا انت مصرى يا حج اسمها عالم نوار او حرمية.
الكشرى اللى كنت بتاكله فى كيس من كم سنة متعاملوش على انه اكلة مصرية اصيلة و بتشم فيها ريحة الوطن دى ريحة الدقة .
طبعاً هأكد تانى و انت عالقهوة اللى شغال عالقهوة مسموش مدير او محمد و بلاش تعيش الدور و تقوله ” #قهوة تركى زيادة سكر سينجل ” لانك كدا هيعملوا معاك الجلاشة … اطلب #قهوة_مانو فى كوباية.
خليك مصرى من غير افورة و انت بتاكل كشرى قوله عايز #ورد زيادة و #كمالة .
لو حاولت تشترى عطر العود هيحصلك حاجات مش كويسة.
فى اجازتى من كم سنة الثقة خدتنى و اشتريت ازازة مياة صغيرة و دفعت جنية ظناً منى انى فالرياض و كانت النتيجة نظرة غريبة من صاحب الكشك كانت ستودى بحياتى …. اسأل على اسعار كل حاجة.
بلاش احداث و تخرج فى ايدك الايباد و انت مبسوط بالتطور التكنولوجى فى الخليج … دا حسونة صاحب بكار اشتراه عادى.
الصامولى فى مصر نوع مسمار مش عيش فينو. – اللى بيشتغل فى المحل اسمه يا برنس انجم ازعيم يا ريس مسموش محمد او مدير –
مفيش حاجة اسمها #سيدا اسمها طوالى او على طول بلاش سيدا دي احسن هتتفهم غلط.
اسمه تكيف على فكرة. – فى جملة كدا لو قلتها ممكن حد يفتكرك مش معانا على الكوكب : ” لما تخلص دوام فوت عليا بسيارتك نروح البنشر نغير الكفرات و نشوف البورى و نتاكد ان الفحامات كويسة و نركب تظليل عشان الحر “.
متتخضش و انت داخل مطعم لوحدك و لقيت فيه ستات بتاكل مع رجالة فى نفس المكان عادى هم سلو بلدهم كدا.
كلمة #عُذاب دى كخة متقولهاش.
و حياة عيالى اسمها ولعة مش جمر . – لو قولت لحد اروح الدوار ازاى ، يا اما هيعتبرك عمدة و جيت هنا غلط او هيعتبرك اجنبى و يشتغلك اسمه ميدان.
قليل من المصريين اللى يعرفوا البروستيد و لو بياكلوه بيبقي على الغدا. مش عشا !! –
الحنطور كنت بتركبه و انت طفل بلاش تقول انا نفسى اركب حنطور فالاجازة عشان صحابك هيدوك كرباج ورا ياسطا .
متروحش عند الكبابجى و تقوله عايز اوصال ، اسمها كباب فى مصر … و الكباب هو الكفته .
انت عارف و انا عارف ان الكامرى اللى انت راكبها فى الخليج بمقام فيرنا فى مصر و شغالة تاكسى كمان فبلاش تتفشخر بيها .
صحيح التاكسى فى مصر مسموش ليموزين.
بمناسبة الفشخرة بلاش تتفشخر بالمياة المعدنية اللى بتشرب انواع مختلفه منها فى الخليج … عشان انت لو شربت من الحنفية هناك هتموت مسموم .
بلاش تطلب من محلات الfast food اكتر من منديل زيادة ، عشان هتدفع تمنه او هيبصلك بصة مش تمام .
نفس الموضوع ينطبق على الكاتشاب ، فكرة الكاتشاب ابو بلاش مش موجودة فى مصر .
لو كنت لسه متجوزتيش و بتدور على عروسة …. ارحم صحابك و بلاش زن … هو اكيد مش مخبي عرايس فى جيب البنطلون يعني .
لو متجوزتيش و اتغربت يبقي انت مش هتتجوز غير جواز صالونات فبلاش توهم نفسك انك هتحب و تتحب و انت بكرش و كبرت و كل دا فى شهر جاى فالسريع.
بالنسبة للشق الديني بلاش الفخر الزائد بعدد مرات العمرة و الحج عشان ربنا كرمك بيهم، الناس هنا بتحلم بركعتين فالحرم .
اذا وجدت ما يبهرك من ذكاء احدهم فأحذر هذه المقولة : ” والله انك ذيب ” …. الذكى هنا اسمه فهلوى ، ناصح ، دؤروم … بلاش جو السياح دا .
الصحن اخر مره اتقالت كانت من احمد مظهر لصباح فى فيلم الايدى الناعمة سنة ١٩٦٤ … اسمه طبق .
اسمه مرتب او sallery مش راتب .
