جريدة الأهرام الجديد الكندية 
مقالات مشابهة
بقلم هشام الدسوقى
السادة الأفاضل اللى نايمين فى العسل هيئة تنشيط السياحة ووزارة السياحة ومحافظ اسوان ، احب افكركم ان يوم الاثنين القادم 22 فبراير ده يوم تعامد الشمس على تمثال رمسيس التانى فى معبد ابو سمبل جنوب اسوان والذى يوافق يوم مولده ، وعلشان اكون دقيق التعامد كان يوم 21 فبراير ولكن بعد نقل المعبد اصبح يوم 22 فبراير ياترى حضراتكم عملتوا ايه استعدادا للحدث العالمى ده ؟ ايه افكاركم السنة دى ؟ هتعزموا مين ومين الشخصيات المهمة اللى هتحضر ؟ مين القنوات العالمية اللى هتصور الحدث ده ؟ مين الممثلين العالمين اللى هيحضروا الاحتفالية دى ؟؟
الاستعدادات اللى اتعملت علشان الاحتفالية دى هتبقى زى كل سنة
#اولا جميع القنوات الاقليمية هتنقل الحدث بسم الله ماشاء الله ربنا يبارك ويحميكم من الحسد والهطل يعنى قناة الصعيد والدلتا واسكندرية وخلافة بجانب القنوات الفضائية المصرية وقناه النيل للثقافة . ( ده كلام رئيس قطاع القنوات الفضائية الدكتور هاني جعفر .
الشخصيات المهمة اللى هتحضر يكون على راسها طبعا السيد محافظ اسوان والسادة وكلاء الوزارات ورؤساء الاقسام يعنى ربنا يزيد ويبارك يارب كفاية كدة مش عايزين حد تانى منكم لله
الممثلين العالمين لسه مفيش اخبار مين هيجى بس السنة اللى فاتت كان موجود احمد بدير وليلى علوى اتوقع السنة دى وزارة السياحة هتفاجئنا وتجيب لنا مثلا احمد عز واحمد السقا أهو منها احمد عز يشوف الفنانة زينة ويسلم عليها ويقسم بالله بأن العيال مش عياله ونحاول نصالحهم على بعض .
الاحتفالية فيها اهم حاجة الاحتفالات والرقصات والعروض الفلكلورية لفرق الفنون الشعبية من جميع المحافظات المصرية اضافة الى العروض النوبية المتميزة وتبدأ فاعليات الاحتفالية من يوم 21 فبراير الجاري وتستمر وحتى اليوم التالي.
بسم الله ما شاء الله يومين بحالهم هنتفرج على رقص فلكلورى أمام المعبد وقت التعامد الله يهدكم يارب
يعنى نفس الأفكار ونفس اللى بيحصل كل سنة وهتلاقى الميزانية تعدى 5 مليون مثلا بدون اى فائدة على مصر ولا على السياحة ربنا ينتقم منكم يارب بعدد الناس اللى زارت ابو سمبل من يوم ما اتنقل من مكانه
على فكرة وزير الآثار الدكتور ممدوح الدماطي وصف الدراسات الخاصة برصد تعامد للشمس على المعابد المصرية القديمة فى أيام محددة من كل عام بأنها “مجرد صدفة” الله يحرقك ياشيخ صدفة وجاى تقول كدة قبل التعامد بكام يوم انت المفروض تتعلق على باب المعبد
الخلاصة مفيش امل ان السياحة خاصة والبلد عامة تتعدل وحالها يتعدل الا بثورة تانى ضد الاشكال الضالة دى بداية من السيسى لأصغر موظف مش عارف قيمة مصر ايه ومش عارف يراعى ضميره منكم لله
#تعامد_الشمس
#معبد_ابو_سمبل
#رمسي_التانى
#هيئة_قتل_السياحة
#لساها_ثورة_يناير
