جريدة الأهرام الجديد الكندية 
مقالات مشابهة
كنت حضرت عرض مسرحي قمة في الروعة أسمه “آمايا” من تقديم فريق ❞أفابرسوم المسرحي – بكنيسة السيدة العذراء مريم بالمطرية❝ وأذهلني طريقة تقديم العرض وخصوصاً أني أعرف المخرج معرفة شخصية جداً فعرفت سر نجاح العرض.
ببساطة أي فريق عمل حابب ينجح المفروض يعمل 6 حاجات علشان يضمن أفضل نتيجة ممكن الوصول ليها في الهدف اللي هما عاوزينه.
1- لازم يتخلي مسئول الفريق عن زي المدير:
كتير أوي من المسئولين عن الفرق (المسرحية – التعليمية – الكشفية ..إلخ) بيبقوا مرتدين ثوب المدير واللي بشوفها بتبقي أحد أهم الأسباب اللي بتأدي لفشل الفريق.
لو المسئول قدر أنه يخلع ثوب المدير واللي بيبقي دوره مقتصر علي أنه يوزع المهام علي بقية الفريق ولبس ثوب القائد اللي بيشتغل مع الفريق وبيحاول دايماً يثبتلهم لا أنا معاكوا وإيدي في إيدكوا وهنشتغل مع بعض ده بيدي حافز أوي لبقية الفريق أنه يشتغل.
2- الدعم الذاتي:
وكلمة الدعم الذاتي هنا أقصد بيها التحفيز بين أعضاء الفريق وبعضه مهما كانت مهمة أي عضو في الفريق صغيرة دايماً الأنسان بيحب أنه يسمع كلمة تحفزه أنه يشتغل ويسعي أكثر وأكثر ؛فلازم كل عضو في الفريق يشجع الثاني علشان يشتغلوا بطريقة متقنة 100%.
3- الألتزام بقواعد الفريق:
من أول يوم يتأسس فيه الفريق لازم الفريق يتفق علي قواعد تبقي زي دستور ولازم كل عضو في الفريق يلتزم بالدستور ده لو فعلاً بيفكروا يلتزموا علشان يحققوا أحسن النتائج.
4- التفكير الأيجابي:
لازم دايماً الفريق يبص بنظرة إيجابية للمستقبل مهما يشوف من عقبات في السكة ولازم أعضاء الفريق يتأكدوا بأن الكويس أكيد جاي قدام ؛بس الفريق يبعد عن الأفكار السلبية لأن الأفكار السلبية ممكن هي اللي تكون عقبة وسبب أن الفريق يمل ويقرر ميحققش أي شئ.
5- حط الشخص الصح في المكان الصح:
من اسوأ الحاجات اللي ممكن تضيع أي مؤسسة أو فريق أنك تحط شخص بيمتلك حاجة معينة في حتة متتناسبش معاه او مع قدراته بالمرة يعني مثلاً أنت لو قائد فريق مسرحي متجبش المؤلف وتقوله عاوزك تمسك الإضاءة وتظبطنا لأنه مش هيظبطكوا لكن هيضيعكوا لأن المكان ده ميتنسبش مع مواهبه أو قدراته فلازم كل واحد يمسك في الفريق المهمة اللي بتتناسب معاه فعلاً ويعرف يحقق فيها النجاح المطلوب.
6- الرؤية:
لازم الفريق يبقي عنده رؤية والرؤية دي ممكن نختصر تعريفها في 3 كلمات وهما ❞عاوز توصل لأيه؟؟❝ لما تعرف وتحدد رؤيتك صح هتبقي عارف تشتغل صح يعني مثلاً مستحيل تاخد العربية وتفضل ماشي في الشوارع وخلاص ! ؛لا بتخلي قدامك رؤية أنا عاوز أروح المكان الفلاني فبتبقي عارف الوقت هياخد قد ايه في السكة وهتستغل بنزين قد ايه والجو ده لذلك لازم أوي يكون قدام عينين الفريق في رؤية واضحة عارفين أنهم هيشتغلوا عليها.
