جريدة الأهرام الجديد الكندية مقالات مشابهة
كام يوم وتعدي السنة .. وكام يابوي سنين عدت .. وكام سنين مرت .. سنة وراها سنة .. كنا ساعات نشوف الهنا قدام عنينا .. وساعات كتير نشرب المرّ بإيدينا .. لايوم يابوي زعلنا ولا يوم ملينا .. العيال كبرت بين ايدينا وعلى ايدينا .. واحنا يابوي واقفين وشايفينهم قدام عنينا .. ودايما جوه عنينا .. لابصينا علي نفسنا ولا قلنا كلّينا .. دايما نيجي علي نفسنا ومن كتر الحمل انحنينا .. العمر جري بينا .. والرجلين مابقتش قادرة تشيلنا .. صح ضهرنا لسه ما تحني .. لكن فيه حاجات تانيه خلتنا اتحنينا .. واهي بتعدي السنين وبتجري جري بينا .. واحنا لاحاسين ولا شايفين العمر اللي بيفر من بين ايدينا .. مادناش لنفسنا راحة وكانت الدنيا بترمح بينا .. ومعاها الليالي بتسرق أحل مافينا ..وبتسرق أسعد ليالينا ..بيني وبينك تعبت قوي يابويا .. ومن كتر التعب الكلام اتحاش منينا .. واعرة قوي كسرة القلب يابويا علي طول بتبان فى عنينا .. بس مين حاسس بينا … نضحك ونهزر ويقولو فرحان .. ولا حد حاسس بالنيران اللي قايده فينا .. واهي سنين بتسرق سنين وبتجري جري بينا .. عشنا مع كل الناس وحسينا بكل الناس .. صدقني بكت عليهم عنينا .. لكن احنا يابوي بنضحك قوي من ورا القلب … ولا حد حس بينا .. المهم مازعلناش حد .. ولاغدرنا بحد .. يمكن هما اللي غدروا بينا .. ادعيلي يابوي يقرب بعيدها .. عشان خلاص قلبي تعب من قلبي وقاله ياخي حرام عليك ملّينا .
بقلم : نشــأت عــدلي
