جريدة الأهرام الجديد الكندية مقالات مشابهة
اندفني بايامك والامك …
خدي الشر وابعدي …
وهاتي للقلب فرحة
عروسة علي راسها طرحه
متزوقه بفصوص المحبة
ومليانه بالخير لكل اهل المحبة
وأروي ارضنا بمية الحب
أرويها حبة حبة
لبنان وسوريا وحلب
القلوب اللي كلها دهب
روحي بخيرك وشرك
بس طول مالحب جوانا
يبقي الرب دايما ماينسانا
هو حارسنا وقوتنا
وهو حامي محبتنا
تروح سنة وتيجي سنة
وعمره ماضاع حلمنا
يقتلونا يحرقونا أنا برضه انا
تعالي أمانه ومعاكي كل الامانه
هاتي معاكي كل الأماني
تعالي حلوه يمكن نقول فيكي أغاني
ويطلع الواد الحليوه المعجباني
بعود وناي ويقول كل الاغاني
تعالي وهاتي معاكي حلمنا
ودوري يمكن تلاقي معاكي قلبنا
هاتي معاكي بلدنا اللى تاهت مننا
هاتي وياكي حبنا
ويمكن تلاقي أسمنا
حاجات كتير ضاعت فيكي
لو كان بإيدي ياسنة كنت افنيكي
من فضلك تعالي هادية حنينه
مبروكة زي وعد ربنا
هو اللى بارك أرضنا
عمر الخير فيكي مايروح
حبيقي دايما معاكي منين ماتروح
حتي لو الأشرار طـلّعواالروح
برضة الخير حيبقي منين مانروح
ادخلي ياسنة برجلك اليمين
واحنا كلنا من القلب نهتف
أميـــن أميــن
بقلم : نشــأت عــدلي
