جريدة الأهرام الجديد الكندية 
مقالات مشابهة
اهلا بيك عزيزى القارئ
انا عارفه ان فى ناس بتفكر ان اللى بيكتب مقال او بيشتغل صحفى او اعلامى ده اللى عارف النمله عنوان بيتها ايه !!!
ومنتظر فى المقال انه يتكتب فيه سر من اسرار المخابرات المصريه
او يكون منتظر خبر زياده فى المرتب او المعاش
لكن للاسف انى اوجههك بالحقيقه المره الكاتب او الصحفى ياما بينقل خبر زى ماهو او اذا حالفه الحظ وعنده موهبة الابتكار والابداع فى مقال فبيقول رايه اللى اتكون عن طريق خبرات سابقه فى حياته او عن طريق الكتب اللى قرائها
كل اللى ممكن يضيفه اليك المقال انه يكون زى مصباح يضئ لك نقطه معينه كانت كلها ظلام بسبب انشغالك فى الحياه والشغل وكدا يعنى
وعشان انا عارفه عزيزى القارئ انك مش محتاج حد يتكلم عن معاناتك فى المواصلات وخصوصا المترو وان كل سعادتك دلوقتى اصبحت تتلخص فى انك تدخل المحطه تلاقى المترو المكيف الحركه دى كفيله انها تعكس انطباعك لليوم كله
وعشان انا عارفه كويس ان مهما التلفزيون اتكلم عن الزباله ومهما كنت مواطن بسيط فى منطقه شعبيه وبقالك سنين بتشوف اكوام الزباله فبرضوا بتضايق وانت بتشوف المشهد ده كل يوم وانت نازل وانت طالع وبيجيلك احساس يااااه لو ينفع استغنى عن شكلى شويه وانضف المنظر ده
وعشان متاكده عزيزى القارئ انك مافرقش معاك التشكيل الوزارى الجديد ومين مسك ايه ؟
ومين خرج ومين رجع ومين لسه ؟ لانك متاكد من جواك ان مفيش فايدة وان الفايده الوحيده فى تفكيرك ان الريس يقول هندى لكل مواطن مليون جنيه وساعتها بردوا هتيجى ناس تقولك المليون جنيه مش هيكفى
وعشان انت عارف وانا عارفه ان اللحمه بقيت غاليه اوووى بس نقول ايه زيها زى كل الخضار والفاكهه
وياريت ماتطلعش قارئ متميز وتقعد تقولى تجارب دول بره اللى نجحوا انهم يزرعوا الشوارع اشجار فاكهه او انهم يستغنوا عن العامل اللى لحد وقتنا ده بينزل يكنس وينظف الشارع بنفسه !!!!! وبدلوا العمال بالماكينات والعربيات
وطبعا بقى مش محتاجه ااقولك التعليم التعليم التعليم
وبرضوا مش محتاجه اقولك المستشفيات المستشفيات المستشفيات
وعيب والله عيب اذا جبنا سيرة البطاله ولا اللى بيحصل دلوقتى عشان انتخابات مجلس الشعب ولا المواهب الشباب اللى بتتقت مواهبهم فى مجلات مختلفه
بص انا مش هتكلم عن اى حاجه خالص
انا بس اللى مضايقنى افلام السبكى اللى مبهدله البلد وبيقولك بيقف جنب المواهب والله فى مواهب كتير مش واخد باله منها خاااااالص
ولا اقولك عزيزى القارئ انا مش هتكلم فى دى كمان
انا هقول كل سنه وانت طيب ومش هتكلم
