جريدة الأهرام الجديد الكندية 
مقالات مشابهة
سليم نقولا
جريده الاهرام الكندى
علي بابا فى البرلمان
————-
– علي بــابــا قـــدم اوراقـــه / يترشح عضو فى البرلمان
– للمغــــارة زاد اشتيــاقــــــه / مقفولة بقالها زمان
– محتاج حصانة تحمى اخلاقه/ اغلى من الدهب والمرجان
– يعمــل بيها مــا بــدالـــــه / وبالقانون يعيش فى امان
– على بــابــا بعــد الثــــوره / لبس كام وش جديد
– وقـــال انجـــــح اول دوره / واملا جيوبى واعيش سعيد
– واسقع اراضى واعمل ثروه/ واخد رشاوى بكل تاكيد
– وابقى مهم واسافر بــــره / والخير يعم عليا ويفيض
– على بابا نسي ان البرلمان / دلوقتى بقى ليه بابين
– باب مفتوح لخدمة الانسان / ويصلح من حال المصريين
– يعمل بذمة ويرضى الديان / وهدفه خدمة المساكين
– وباب مفتوح لسكة اللومان / يقضى باقى حياته سجين
================
اهل الفن
—-– يا اهل الفن كفايـة زن / وصلنا معاكم طريق مسدود
– التنطيط بقى اسمة فـن / والمنجد بيضرب ع العود
– واللى صوتها مش طالع/ عاملة فيها مغنية
– وعشان قوامها فـــارع / بقت فنانة استعراضية
– اغنية تعيد وتــزيـد فيها / والمكان شغال على حسها
– والجمهور كلة معجب بيها / ومبسوط من هز وسطها
– كله عــــامــل فيها فنــان / وفاكرها بقت وراثة
– وبيعزف لحن على الكمان/ ومسجل صوتة على فلاشة
– كلام خارج من غير احساس/ لا دراسة ولا موهبة
– والفن بقى سجاره وكاس / وشلة وقعدة على المصطبة
– يــا زمــــــن الفن الجميل / ارجع دمنا بقى محروق
– اشتقنا للفن الاصيل / وكفاية خانقة وقلة زوق
===============
يا ايلان
+ البحر كان احن عليك من ظلم الانسان
+ طلعك على الشط بره ترتاح فى امان
+ موج البحر رفعك وانت فيه غرقان
+ القلب والعين بكوا لما شفوك يا ايلان
+ حسيت انك ابنى وصاحبى واخويا كمان
+ مين قتلك يا ايلان … الخسيس ولا الجبان
+ كلنا قتلناك وغرقنا فى بحر النسيان
+ وعرفنا ان الملايكة ع الارض ملهاش مكان
===================
