جريدة الأهرام الجديد الكندية 
مقالات مشابهة
كلمه بقت كتير اوى بتتقال ع لسانى كل ما اشوف حد منصب نفسه قاضى على حد
يارب ننضف مجرد شعار لحاجات ومواقف كتير فى حياتنا لكن عشان احنا فى مجتمع شرقي فابسط مثال والاقرب لكل واحد مننا هي البنت لدرجة اننا بقينا بنوصفها بالاتجاه المعاكس “شمال”
البنت اللى وجودها فى حد ذاته بيسير الكلام والتساؤل حولها مثلا
مش كل بنت بتلبس وتنزل أولها اصحاب تبقي شمال وبردوا مش كل بنت عندها حلم تبقى شمال
لو فكرنا فعلا ف البنات اللى حوالينا هنلاقى بنات شمال وبنات كتير كويسين
مش معنى ان ليها اصحاب انها بتحب كل واحد شويه ومدورها ممكن تكون راجل وسط الرجاله واجدع منك كمان
ممكن تكون عايشه عشان تحقق حلمها مش عشان انت تيجى تقول عليها سايبه او فين اهلها
ممكن يكون اهلها ناس محترمه ومتابعين بنتهم ونفسهم يفتخروا بيها وممكن بردوا يكونوا مكبرين دماغهم
ممكن تكون بشعرها لكن محترمه جدا طب ماحنا كتيييييييييييييير جدا مننا واخدين ان كل المنقبات شمال
الفكره مش بالمظهر زي ماناس كتير مننا فاكرين ناس كتير تبان محترمه ومن جوه ….. ومكذبش المثل اللى قال
من بره هاالله هالله ومن جواه يعلم الله
افكار غريبه بقت دخيله علينا لدرجة اننا بقينا بنشوف البنت اذا نزلت صورتها على النت تبقي فاكره نفسها ملكة جمال الكون واذا منزلتهاش تبقي اكيد وحشه
الموضوع كله انها شخصيات بعقول مختلفه من بيوت مختلفه ف بيت ممكن ياكل مع السمك رز احمر وبيت تانى ياكل مع السمك رز ابيض
مفيش بيت منهم يبقى وحش بس ف كلمة يارب ننضف مبقاش حني عندنا اننا نتقبل الاخر بشكله وتصرفاته ورايه وفكره اللى اكيد بردوا هو مر بتجارب انت ما مريتش بيها
ممكن نفكر للحظه اننا لما نشوف حاجه قدامنا او نجيب سيرة حد ليه مانفكرش بالنيه الكويسه قبل النيه السيئه
امته هنبطل نفكر ف ان اللى قدمنا وحش ليه مابيجيش فى بالنا احتمال طب ما ممكن يطلع كويس بلاش ان انا احسن واحد وان انا الوحيد اللى مريت بجرح عمر ما حد مر بيه وان خبرتي خلاص بقت تدرس
وفى نفس الوقت بلاش الطاقه السلبيه اللى بنطلعها فى تريقه او انتقاد لاى حد شيفينه فيه امل اوعنده طاقه وهدف
ليه منبقاش ناس كويسين ايجابين ونشوف اللى حوالينا بعين حلوه واللى نشوفه كويس نتعلم منه اكيد كل واحد فينا لسه ناقصه حاجات كتير محتاج يتعلمها
لما نشوف واحد ناجح ف شغله نتعلم بينجح ازاى؟
او واحد عنده حلم وبيحاول يسعى له وبيتعلم اكتر عشان يقرب من حلمه
مثال البنت فى مجتمعنا قولته مش عشان ااقول قد ايه البنت مقهوره لكن عشان هي مثال كلنا بلا شك مرينا بيه سوا بنت او ولد حتي البنات ساعات بيفكروا فى بعض كدا
زي ما فى زملاء كتير فى العمل بيفكروا ازاى يحبطوا الناجح او يأثروا عليه
ليه منبقاش محللين بشكل ايجابى لكل اللى حوالينا عشان نكون افضل
ليه منبقاش انضف
