جريدة الأهرام الجديد الكندية 
مقالات مشابهة
الأهرام الكندى
ارسل ابن عم المجند بهاء جمال ميخائيل حواراً فى غاية الأهمية يكشف عن معلومات جديده وخطيرة حول مقتل المجند بالقوات المسلحة بهاء جمال ميخائيل سننشر الحوار كما ورد لنا بدون أى تدخل منا
واليكم نص الحوار
الى من يهمه الأمر فيه موضوع حصل و انا ماكنتش عاوز اتكلم فيه لغايه لما المحامين يقدموا بلاغ رسمى بالواقعه
– لما رحنا نستلم جثه بهاء من المشرحه ادونا كل المتعلقات بتاعته منها الناى و المحفظه و الفلوس و الانجيل و الاجبيه بتاعته اللى فيها دم و القرص المعدنى , و لما سألناهم عن موبايله اللى كان معاه فى الجيش قالولنا : الموبايل متحرز فى النيابه العسكريه … الكلام ده قاله النقيب اللى جه و العقيد قائد الكتيبه كمان
– يوم السبت قبل اللى فات الساعه 11 عرفت من بيت بهاء ان نمره بهاء بتاعت الجيش رنت على موبايل اخته مريم و فصل قبل ما حد يرد ….
عم جمال ابو بهاء اتصل بالنمره و قال الموبايل ده رن علينا من شويه انت مين ، اللى بيكلمه حلف انه مارنش اصلا ! ( امال ازاى عرفنا ان الموبايل اشتغل و هو مقفول من فتره ) … المهم قاله انت جبت النمره دى منين و ايه الموبايل اللى معاك ؟ رد الشخص الغريب و قال : ده موبايل اسود صغير سامسونج و صاحب الموبايل هو اللى اداهونى و ده صاحبى ( للعلم بهاء كان معاه الموبايل ده و الخط ده و كان بيكلمنا بيه من الجيش )
عم جمال : اداهولك امتى الموبايل و ازاى و مين هو
الشخص : ادانى الموبايل من اسبوع ( مع ان الحادثه كان عدى عليها حوالى 18 يوم ) .. و هاقوللك ازاى هو كان سايق عربيه كيا سيراتو على الدائرى و عمل حادثه – ( بهاء ماكنش بيعرف يسوق عربيات اصلا و ماعندوش عربيه ) – و عمل حادثه صغيره فانا نزلت اطمن عليه و نزلت من عربيتى و لما رجعت مالقيتش الموبايل بتاعى فى العربيه بتاعتى ف رحت معاه المستشفى و لما عرف ادانى الموبايل ده و قاللى خليه معاك لغايه اما ترجع الشريحه بتاعتك .. و انا عرفت انه رتبه فى الجيش و تقريبا على طريق مصر الاسماعيليه الصحراوى -( كتيبه بهاء كانت على طريق مصر السويس الصحراوى ) و كمان عرفت انه بيلعب على الآت موسيقيه
…………
انا سمعت الكلام ده و ماقتنعتش فاتصلت بالنمره بتاعه بهاء على طول و رد عليا شخص فعلا و دار بينا الحوار التالى
انا : حضرتك مين و الموبايل ده جالك ازاى
الشخص : انا اسمى خالد عطيه ابراهيم و شغال مهندس زراعى من امبابه … و الموبايل ده اداهونى صاحبه بنفسه
انا : اداهولك صاحبه ازاى و امتى
الشخص : من اسبوع كنت سايق على الدائرى و لقيت حادثه صغيره وواحد واقف نزلت اساعده ولما رجعت عربيتى مالقيتش الموبايل قولتله يرنلى عليه لقيناه مقفول .. و لما شافنى محتاس قالى انا معايا موبايلات كتير و خطوط خد واحد منهم و مشى بيه حالك -( مع انه كان قايل لعم جمال انه اخده منه فى المستشفى )
انا : طيب بهاء ده صاحبك قوى لدرجه انه يديلك موبايل
الشخص : لا انا ماعرفوش بس هو حب يرد الجميل – ( مع انه كان قايل لعم جمال انه صاحبه )
انا : طيب بهاء ده شكله ايه و شغال ايه يعنى
الشخص : بص هو عسكرى فى الجيش و بيلعب على الناى و شكله زى البنى ادمين يعنى ( !!! انا استغربت من الرد ده لانه مش عاوز يوضح وخاصه انه قال قبل كده انه رتبه )
انا : طيب هو بهاء ده كان لابس ايه ؟
الشخص : كان لابس قميص و بطلون عادى
انا : شخص كان لابس قميص و بنطلون عرفت حضرتك منين انه عسكرى هو حاطط نسر على وشه يعنى و عرفت منين انه بيلعب ناى … واحد عامل حادثه هايقوللك الحقنى انا عسكرى فى الجيش و بلعب ناى
– الشخص سكت شويه و بعدين قالى : مانا سألته انت شغال ايه فهو قاللى
انا : طيب يا باشا الموبايل ده المفروض انه متحرز فى النيابه العسكريه و معنى انه معاك يبقى فيه حاجه غلط ,, مستعد لو اتطلبت للشهاده عشان تقول الكلام ده فى النيابه العسكريه تيجى
الشخص : و اجى ليه انت بتهددنى يعنى
انا: لا يا باشا انا مش بهدد و لو عاوز اضرك ماكنتش كلمتك اصلا مستعد تيجى و لا لأ
الشخص : ايوه اجى مافيش مشاكل
انا : طيب يا باشا عنوانك فين بالظبط
الشخص : امبابه – الاعتماد ش3 عماره 405 و اسمى خالد عطيه ابراهيم – مهندس زراعى
سلام
……………….
الخلاصه مافيش فى المنطقه دى عماره 405 و مافيش حد فى الشارع بالاسم ده اصلا
المحامين راحوا النيابه العسكريه و قدموا بلاغ بالواقعه و عملوا طلب كشف بالمكالمات اللى طلعت من الخط ده
………….
اللى محيرنى بقى
– اشمعنى الاتصال فى الوقت ده و باخته بالذات
– لما صاحب الموبايل اداهولك من اسبوع فضلت قافله اسبوع كامل و بعدين افتكرت تشغله و هل خلال الاسبوع ده مارجتش الشريحه بتاعتك المسروقه
– ازاى حد عامل حادثه و لابس ملكى تعرف انه عسكرى فى الجيش و بيلعب ناى .. و غيرت كلامك فى كل مكالمه
– ازاى الكتيبه تقول ان الموبايل متحرز فى النيابه العسكريه و يحصل منه الاتصالات دى … كده اكيد مش متحرز … طيب ليه القياده بتاعه بهاء تقولنا انه متحرز و تكدب علينا … خايفين ليه
– ازاى اداهولك من اسبوع و الحادثه عدى عليها 18 يوم
– الموبايل اتقفل معنى كده انه كان عاوز يعرف حاجه و قفله .. اللى انت عاوز تعرفه من اهل الشهيد يعنى … لو انت مخابرات هل اهل الشهيد جهه شك
– احيانا غلطات صغيره بتكشف الجانى . . مافيش جريمه كامله
– موضوع الموبايل ده خيط مهم جدا …. مش معنى اننا مستنيين تقرير الطبيب الشرعى و ساكتين نبقى مش عارفين
– كلامك المتناقض و كدبك بيأكدلنا الشبهه الجنائيه
