جريدة الأهرام الجديد الكندية 
ماريا …..للشاعر عزت حلمى
عشقت الرمل والمية على شطك يا حورية
وعشت سنينى فى حضنك اضمك شوق وحنية
وأشوفك حتة م الجنة وعصفورك بيتغنى
وعقد الورد والحنة يغازل رمشى وعينية
نسيمك مسك ومعطر وشمسك ماشية تتمخطر
سحابك لما بيمطر بيغسل توبك الاخضر
وبأتمنى أعيش فيكى وأبات اسمع غناويكى
وبعشق سحر حواريكى و ألوان الملاغية
ووقت غروبك الساحر يحرك فيا أشجانى
وشمسك لما بتسافر تداعب عقلى وكيانى
وأشوفها عايمة قدامى شعاعها البمبى الهامى
وأتوه وأسرح بأحلامى ف أجمل صورة الهية
و ع الكورنيش فى عز الليل ألاقى الدنيا ضحكا لك
وأشوف أحباب بودجميل بيتغنوا بموالك
ودنيتهم صفت ليهم يا أجمل حلم فى عينيهم
ولما الفجر يلاغيهم قلوبهم بتبقى مروية
فى كل الدنيا عرفوكى مداين اسمها اسمك
صحيح نفس الحروف فيكى لكن يفرق كتير اسمك
ولما بيجوا يشوفوكى يهنوكى ويغزلوكى
وف عقولهم ما ينسوكى يروح واحد يعود ميه
أثار وكنوز بمكنونها يلاقوها على شطك
علوم الدنيا وفنونها جمعتيها ف مكتبتك
وعلى جسرك بيضوى فنار وليلك بيه بيبقى نهار
وسجلتى على الاسوار تاريخك لوحة مرئية
يا احلى مرسى ومدينة وأجمل صورة ف عنينا
لعشاقك بقيتى مزار وميادينك بقت مينا
وصفك بقلمى رفعنى لفوق يا أسكندرية يا أم الذوق
ولو قالولى اختار معشوق معشوقتى أنت يا ماريا
