فاكسات مهاجر يرسلها: مدحت عويضة
17 يونيو، 2015 مقالات واراء
السيسي
المصريين بيحتفلوا بسنة أولي رئاسة عقبال ما تتخرج بالسلامة من غير ما يقلبوا عليك
محلب
كانت عندنا مشاكل مع محافظ المنيا بقت المنيا وبني وسويف وربنا يستر علي الباقي
محمد عمارة
بتقول المسيحية ديانة فاشلة ومش لاقي غير كلمة اللمبي وانت مال …. أنت؟.
شيخ الأزهر
إزدراء المسيحية في مجلة تابعة لمؤسسة الأزهر دليل أن مصر متحتاجة ثورة تطهير
باسم يوسف
عملت حلقة عن زيارة مرسي لألمانيا بزمتك كنت هتعرف تعمل حلقة عن زيارة السيسي؟؟ ربك والحق مرسي خسارة كبيرة لكل عشاق السخرية.
حزب التجمع
بقينا كل اسبوع عندنا ازمة راقصة من صافيناز لراقصة المطار لأمسك ايدي لراقصة حزب التجمع أرحمونا بقي.
محمد مرسي
بطل تاكل كل البط في السجن رمضان جاي ومش عايزين فضايح من الإخوان اللي معاك في السجن.
سامح عاشور
مع رفضي لمبدأ الاعتذارات لكن أول مرة أعرف أن نقابة المحاميين أهم واقوي من الأقباط.
محمد حسان
تجوزت 17 مرة وجايبينك تجدد الخطاب الديني الحمد لله إللي ما صحوش أبو جهل من قبره.
عمدة كفر درويش
بتقول مغادرة الأقباط حفاظا علي أرواحهم وليس تهجيرا والنعمة دمك خفيف تعالي إكتب الفاكسات وريحني.
أردوغان
فرحانين لعدم حصولك علي الأغلبية ربنا يكمل فرحتنا والاحزاب التركية تشكل حكومة إئتلافية يارب.
ستيفن هاربر
قبل الحملة الانتخابية تردو وكاثلين وين مهدولك الطريق للفوز مبروك مقدما
كاثلين وين
نجحتي في تصوير المعترضين علي مناهج الجنس بانهم رجعيين ومتعصبين لا أنا واحد منفتح جدا ومعترض علي مناهج الجنس.
حزب النور
هو الشيخ ونيس هينزل انتخابات تاني بيقولوا ربنا تابها عليه من الزراعي وشغال صحراوي دلوقتي.
السفير المصري بكندا
عايز أعرف سر السكرتيرة اللبنانية اللي أتغير عشرين سفير وهي لسه موجودة ومين سمح لها بقلة الأدب في ردودها علينا.
جريدة الأهرام الجديد الكندية 
