جريدة الأهرام الجديد الكندية 
مقالات مشابهة
بقلم وريشة : ميلاد ثابت اسكندر فنان تشكيلي
عــايـز أقولك حـس بــيَّ، وبمشـاكلــي وبظـروفــي
مش هقول جايين علـيَّ، مش هقول زودتوا خوفي
بـس لـو تـقـدَر ثوانــي، تحُـط نَفسَك أنت مكــانـي
عيش حياتي ولو في فكرك، وأنت تعرف إزاي بعاني
شوف يا صاحبي إزاي بَعيش، عيش حياتي وقولي رأيك
ولا صـاحبـَك مايسـاويـش ؟؟!! لـو ثـوانــي مـن كل وقتك
داحنا عايشين في البَلد دي ،، أرض واحــده بتسـد جـوعنـا
والمَيَّه إللي في النيل بتجري، هي إللي بتفيض من دموعنا
داحنـا أخوَّه فـي الإنسانيــة، أب واحد أم واحدة .
يعني دَمي هو دَمك، ليه القلوب آسيَة وجاحدَة ؟!
عايز أقولك حس بيَّ، حس بالظُلم إللي شايفُه
ولا راضي أكون ضَحيـة، فكـر جــاهـل أنت عــارفُـه
ده الإلـه قاضــي وعـادل، هَيقـاضيك يـوم القيـامة
لو سِكِت عن ظُلم صاحبك، لو عَمَلت زي النعامة
ده الساكت ع الحق دايماً، زي شيطان أخرَس جبان
وإللـي بيقول الحقيقــة، رَب الحقيقــة ليـه مُستعان
حس بيَّ، حس بالدَم اللي نازف من قلوب طاهرَة نقية
قـلـب أم علـي إبنهــا … مـات شَهيـد كـان الضـحـيــــة
أم تانية بنتها، مخطوفَــة منهـــا ومـافـيــش قَـضـيَّـــــة
مين يـرَجـَـع عَــرضـهـــا ؟؟؟ مين يــداوي جــــرحهـــــــا ؟؟!!
ميـن يحــس بنــــار وقــايــدة فــي قـلبهــا المسـكيـنـــة ديـا ؟!!!
حـس بـيَّ، حـس بالقَهـر اللـي لَفلِـف قيـد شـديد حـوالين إديـا !
والصراع مَـزَق كياني، عين بعين؟ ولا المحبة واحترامي للوَصيَّة ؟
حــس بـــيَّ
********
