جريدة الأهرام الجديد الكندية مقالات مشابهة
بقلم .. جميل أندراوس
الناس عمالة تتكلم عن الحد الادنى .. وناس غلابة قاهرها الزمن ..ناس مطحونة يا ولداه …فئة كتب على جباههم اولاد فقراء ..فئة تعيش على امل الاصلاح ..طلعوا فى الثورة وعلو الصوت ونادوا عيش حرية عدالة اجتماعية .. ومات اللى مات ..وضاع اللى ضاع ..عايزيين عدالة تحقق على ارض الواقع مش شعارات وكلام رنان .. طاب خليكوا عملت الحد الادنى والناس اللى ماليا البيت شهادات ولحد سال فيها بتعيين ولا حد سال عنها .. ناس ملهمش وظائف ..انا باتكلم عن تجربة فانا احد هؤلاء الذين كتب على جباههم اولاد فقراء حصلت على دبلوم المدارس التجارية ثم معهد الادارة والحاسب الالى بتقدير جيد جدا مع مرتبة الشرف ثم كلية تجارة قسم محاسبة عام 1997 وزمايلى اللى كانوا معايا على تختة واحدة وكانوا بيشحتوا سؤال فى الامتحان علشان ينجحوا تبص تلاقيهم علشان الكوسة والرشوة اللى كانت مالية البلد اللى تعينوا فى مناصب مرموقة اللى فى وزارة العدل واللى فى وزارة المالية واللى فى التربية والتعليم واللى فى البترول .. مع ان التقدير هو التقدير او حتى التقدير الاقل ما فرقاش مدام بيدفع .. واحنا يا عينى علينا عايشيين ومش عايشيين ..عمالين نتشعبط فى الدنيا علشان بس نعيش ..شوية عمال يومية ..وشوية باعة جائليين امال هنعمل ايه هنحط ادينا على خدنا ونستنى جنب الحيط ..حد ادنى لمين ياعم احنا مش طايلين غير الهم و حرق الدم ..نفسى فى يوم حد يبص على الغلابة الشباب المقهوريين مسئول يقعد معاهم ويشوف همومهم ويعالجها ..نفسى اشوف اعلامى له ضمير مهنى يصرخ ويفجر قضاياهم ..بس دول ياعم يبصوا لمين هم دول حد بيحس بيهم ..دا حتى الوزير اللى بيمثل العدل طلع يهين المساكيين .. دول يا ناس مش بيعرفوا يعنى ايه فقير ..طاب عمالين تقولوا حد ادنى …حد قال حد اقصى وناس بتهبش ملايين ..حد قال العدالة تبقى ان التباين ميبقاش بين الناس كبير ..يعنى ما ينفعش ناس مش لاقيه للفلوس مكان وناس غلابة تكح تراب ..حد جاب للحد الاقصى سيرة ..طاب حد سال فى الناس اللى لا ليها حد ادنى ولا اقصى ..الحلم يا عالم مش حد ادنى.. الحلم عدالة ومساواة ..الحلم الفقير يبطل ااااه ..الحلم نشعر ببعضينا ..الحلم ان مفيش فى مصر فقير ..حلم الناس الغلابة حد يحس بيهم ..ولا انتم رايكم ايه.
