جريدة الأهرام الجديد الكندية مقالات مشابهة
بقلم .. حمدي الجزار المحامي
منذ نعومة أناملنا وحين انتبهنا أننا نعيش وسط أناس مثلنا في الشبه والنوع ونحن نسمع أن هناك طبقة من هؤلاء الناس إسمهم طبقة ( الاكابر ) وحين إشتد عودنا بعض ما وبدأت الستنا تنطق بفصاحة مكسرة وسألنا مين الناس دي ؟؟ أجابوا علينا أنهم ولاد الناس ،، وبعدها بسنوات احتار العقل شيئا فشيئا وبداخله سؤال ،،يعني همه ولاد ناس وإحنا ولاد مين مش إحنا ناس بردو ؟؟؟ أجابوا علينا ،،أيوه طبعا إحنا ناس بس غيرهم دول ولاد الملوك وألامراء والباشوات بتوع زمان ،، سكتنا وسمعنا وقولنا جايز
ومع مرور الوقت فضلت العبارة دي محل تساؤل لان ولاد الملوك والباشوات والامراء اغلبهم ماتوا ومش موجودين ولسه العبارة موجودة ( الاكابر وولا د الناس )
نسكت بقى لا طبعا ،، سألنا تاني ليه ؟؟؟ اجابوا أصل دول ولاد الناس الاغنياء واصحاب المراكز والسلطة واللي موجودين في المدارس والجامعات الدولية الكبيرة بتاعتهم وساكنين في فيلات وقصور ،، رجعنا تاني قولنا يمكن ،،بس فضلت علامة استفهام جوه الراس مش راضية تهدى
ولما بدأنا نفهم وطلع لينا عقل كده ،، مع شوية لماضة مع طولة لسان وبقى لينا عيون وبدأنا نشوف رجعنا نحشر نفسنا تاني ونسأل
طيب نشوف ولاد الناس دول ولاد مين ،، لئينا حاجة غريبة اوي بس في سركم طبعا طلعوا ولاد ناس اغلبهم جاي من الارياف والصعيد من عندنا يعني وولاد ناس بسيطة كده زينا واتعلموا في مدارس حكومة زينا ،، وشربوا من القلة والزير ،،واكلوا على الطبلية ،،وكبروا وراحوا جامعات حكومة ومجاني بردوا زينا ،،واتعينوا في اماكن وكبروا جوه الاماكن عادي يعني كده تسلسل وظيفي مع شوية كفاءة كده زي حالتنا .
بس إيه بقى اللي سكنهم في فيلات وقصور وركبوا عربيات من الغالية متعرفشي ؟؟؟ وعليه بئوا همه الاكابر وولادهم بئوا ولاد الناس .
يادي الحيرة ياولاد هيه العبارة دي ورانا ورانا ،، طيب زمان وقولنا ولاد ملوك وامراء وباشوات وتسلسل عائلات مش تسلسل وظيفات ،، حاجة غريبة
طيبب هوه فيه فرق ياحشريين بين أكابر زمان وأكابر دلوقتي ،، طبعا فيه ،،
اكابر زمان كانوا من العيلة المالكة عندهم ثروات كبيرة ورثنها من اجدادهم ومتعلمبن تعليم ملكي وعلى ايدي ناس إيه مئولكشي وعندهم كده هيبة وعزة واصالة ،،
وولادهم ولاد ناس انما ايه ثقافة وتربية واخلاق وكلام مدهون بزبدة كده وراقي ،،وبناتهم ايه همه أصل الجمال والحلاوة والرقي
اما ياخواتي اكابر اليومين دول متعرفشي مالهم وايه اللي حصلهم وايه اللي حولهم كده وكمان بقى ايه اللي نفخهم اوي كده وعلى ايه ،، مسكوا مناصب في الدولة نقول ماشي ليهم مرتبات كويسة كده بتاعة الحكومة قولنا بردو ماشي ،،بس الثروات دي بقى منين والفيلات منين متعرفشي ؟؟! ماعلينا !!!!
طيب وولادهم ولاد الناس اخبارهم ايه طلعوا كده لوحديهم ولا ناس بس إيه في منتهى قلة الادب ولا اخلاق ولا تربية ولاثقافة ولاعلم بس الشهادة لله بيتعلموا في مدارس ايه سبع نجوم وبيتكلموا ايه كام لغة كده وتشوف الواد ولا البنت منهم تحس انهم مسخ كده ولا عارف يبقى ابن ناس ولاطايل يكون زينا بس كل ماحد يكلمه يقول انت مش عارف انا مين وابن مين ،،
ماعلينا ،، احنا مالنا بلاش نبقى شعب حشري كده خلينا في حالنا احسن .
بس بقول ايه انتظرونا دايما أصل ماخبيش عليكم الطبع غلاب وإحنا بصراحة حشريين ونحب نسال كتير .
