جريدة الأهرام الجديد الكندية مقالات مشابهة
بقلم .. مها البدينى
المطرية مش محتاجة حل أمنى المطرية رجالة أوى وناس محترمه ويعرفوا الأصول وكرما أوى وغلابة جدا الفقر أنهكهم زى المئات والآلاف من المصريين والبطالة تعبت الشباب فيها جدا فى ناس تحت خط الفقر وناس عايزين يعيشوا ويربوا أولادهم، الأطفال محتاجين ملاهى حلوة ومكتبة بدل الملاهى اللى جنب الجراش فى المسلة المطرية محتاجة جناين ومساحات خضرا وواسعة المطرية محتاجة أن الشوارع بتاعتها تتنضف محتاجة إهتمام بالخدمات العامة المطرية محتاجة الناس تسمعلهم المطرية محتاجة إهتمام بالأطفال هناك مش محتاجة حل أمنى وأن الداخلية تنزل تقتل فى أولادها بمجرد أنهم يبيعبروا عن رأيهم، المطرية محتاجة أن الأطفال يلعبوا ويروحوا النوادى بدل ميتعلموا العنف والضرب ويشوفوا الدم ويبقى عادى عندهم.
المطرية محتاجة حد يسمعها بجد وينقل كل اللى بيحصل فيها ينقل الحقيقة وبس وينقل مطالب الناس وظروفهم وحياتهم مشاكلهم ويعالجها ويحلها ويرفع من شأنها.
المطرية مش عايزة وزير الداخلية ينزل يزور ميدانها عشان يقولوا أن الأمن مستتب ولا عشان الإعلامى أحمد موسي يقول أننا لازم نبيد المطرية، المطرية حتة مننا المطرية جزء من تكوين مصر الأصيل ويمكن أحلى مكان ممكن تخرج منها مواهب كتير جداااا وأحلى مكان فى مصر وأجدع ناس ممكن تشوفهم فى حياتك يقفوا جنبك وقت الشدة رجالة ورا ضهرك رجالة جدا جدا، المطرية محتاجة أن الميدان يتحول لمنطقة خضراء واسعة وجنانين وزهور عشان نقدر نعيش فى سلام وأمان.
بس هي دي قصة المطرية هو دة اللى عايزاه المطرية المطرية مش محتاجة أن الداخلية تضربها برصاص حى وتموت أولادها وتصدر العنف فى كل أبنائها المطرية فيها شباب عايز يقول رأيه بحرية بدون قيود المطرية محتاجة تتسمع بإهتمام محتاجة عقل وفكر وإحتواء وتقدير.
تحيا المطرية
تحيا جمهورية مصر العربية
