جريدة الأهرام الجديد الكندية مقالات مشابهة
الأهرام الجديد الكندى
نشر مختار التتش زميل شيماء الصباغ فى حزب التحالف الشعبى الاشتراكى والمجاور لها فى وقفة أمس شهادته على ما حدث فكشف جوانب كثيرة واليكم ما كتبه بالنص بدون تدخل منا
احداث 24 يناير 2015
فى الميدان ورد بيسلم ورد
نفسه يرجع حق الورد اللى فتح فى جنانين مصر
فى شارع هدى شعراوى مشينا مسيره كان عددنا لا يتجاوز ال 30 فرد
واتجهنا الى طلعت حرب
وبدأنا الوقفه مع هتاف ”عيش حريه عداله اجتماعيه
صوت الثوره طالع طالع ومكملناش 5 دقايق راح الباشا العميد مشاور ناحيتنا وادى امر الضرب ضربوا فى المليان وكانت المسافه اقل من 10 امتار واحده فى رجلى الحمد لله جت سليمه وكملت جرى برجل واحده لحد ما وليد صبرى شدنى ناحيه شارع هدى شعراوى
وضربه فى وش محمد الشريف من اسكندريه والحمد لله جت سليمه والبلى طلع من وشه بس ايده جالها شرخ وبردوا نقول الحمد لله
وضربه فى شيماء الصباغ وقعت ع الارض كانوا الشباب بيجروا اتكعبلوا فى بعض شالها سيد ابو العلا اللى بعد كده قبضوا عليه وكان جاى وراه مصطفى عبدالعال قعدوها وكانت لسه مفتحه بس النفس بيروح
كملنا احنا وهما دخلوا ع القهوه وكل ده الامن بيجرى وراء كل المجموعه
شيماء قطعت النفس مصطفي شالها وقعد يدور على تاكسى يوصلها لمستشفى علشان يطمئن عليها لانها كانت قطعت النفس
فى نفس الوقت اللى الامن قبض على مجموعه منها طلعت فهمى ومحمد صالح طالب من المنوفيه و واحد من اسكندريه وراح مكمل وقبض على مصطفى عبد العال وسيد ابو العلا وكملت استاذه نجوى عباس مع شيماء كل ده فى حدود وقت 10 دقايق ودخلت المستشفى وجالنا الخبر
اتجمعنا قدام المستشفى والامن جه هو والاسعاف ياخد الجثه والباشا العميد قال محدش يركب معاها وخدها وطلعوا على مشرحه زينهم
روحنا وراهم وطبعا لسه اسلوبهم وسخ قعدنا بره وهما ولا هنا والامن فى كل حته وراح مطلع بيان بعدم اطلاق نار ولا خرطوش كدب كالعاده
وطلبونا للشهاده رحنا عند النيابه كانوا عاملين كمين ودخلوا مجموعه
ومنعوا الشباب يدخل بحجه ان اللى بيدخل اتنين اتنين والكماشه اتعملت انا و وليد صبرى واسلام اسامه وقدرت انا ووليد نمشى من اتجاه واسلام من اتجاه تانى ولسه الامن بيقول سنبحث عن الجانى لازم يبصوا فى المرايه يشوفوا نفسهم ساعتها هيعرفوا مين الجانى
– اللى خايف من مجموعه اقل من 30
– اللى بيقتل القتيل ويمشى فى جنازنه
– اللى خايف من شعار عيش حريه عداله اجتماعيه
– اللى عنده شماعه اسمها ارهابيين
– اللى عنده اعلام بيطبل للى قتل ويشوه ف المقتول
ولسه ناس بتستهبل وتقول
مين الجانى ??!!!
الجانى هو اللى بياخد برائه بعد القتل والسحل والاغتصاب …
فى الجنه يا شيماء
فى الجنه يا ورده الميدان
