جريدة الأهرام الجديد الكندية مقالات مشابهة
الأهرام الجديد الكندى
كشف الكاتب والباحث اليسارى المعروف إلهامى الميرغنى على صفحته الشخصية التفاصيل الكاملة لمقتل الشهيدة شيماء الصباغ عضو حزب التحالف الشعبى الأشتراكى خاصة وأنه ظهر بصورة وهو يمشى بعكاز بجوار الشهيدة واليكم نص شهادته كما كتبه على صفحته الشخصية
من اقل من اسبوع كنا عاملين ورشة لتطوير البرنامج العمالي للحزب وشيماء كانت موجودة هي وبلال وقعد طلعت فهمي يشغل بلال ويقوله ودي الورقة دي وهات الورقة دي بلال وهو ماشي حضن كل واحد فينا حضن كبير ولما طلعت باسله قاله ياعمو طلعت انا باحبك قد الدنيا كلها
وشيماء كانت سعيدة بفكرة وضع إكليل الزهور علي النصب الذكاري لشهداء يناير والصبح بعتت بوست بتقول قربنا من رمسيس ومعايا اجدع شباب من اسكندرية حضروا السندوتشات المواصلات علينا والباقي عليكوا لما الزميلات والزملاء نزلوا من الحزب وقعدت انا والاستاذ حلمي شعراوي قالي احنا هنقعد ونسيب الشباب لوحدهم يلا بينا ونزلنا
وصلنا طلعت حرب وقولنا خمس دقائق وهنروح التحرير
والزميل مدحت الزاهد قبل ما ننزل نبه علي الشباب عايزين نظبط اعصابنا ونوصل رسالة بان 25 يناير ثورة مستمرة ونحط الورد ونرجع
لكن الداخلية معجباهاش شكل الورد
ومعجبهاش الاحتفال وبدأت اطلاق قنابل الغاز والخرطوش
كل اسلحتنا كانت باقة زهور ولافته كبيرة عليها عيش حرية عدالة اجتماعية واوراق عن استمرار ثورة يناير
لما بدا اطلاق النار اتحركنا في اتجاه المقر وفي اتجاه التحرير واحنا بنجري كان صوت بلي الخرطوش بيرن علي البلاط
ولما شيماء وقعت افتكرتها اتكعبلت ولكن صوت ضرب الخرطوش كان جنب وداني
انا ما بقتش عارف احنا اتصبنا ولا لا
وشفت زميلنا سيد ابو العلا ومجموعة زملاء بيحاولو يشيلو شيماء
لكن لما بعدنا وبدأنا نطمئن علي باقي زملائنا عرفنا ان شيماء مصابة
زميلي شعبان عبد اللطيف اتصل يسأل علي شيماء وقلتله هأسال واطمنه
ولما عرفت الخبر المفجع مقدرتش اكلم شعبان
وقعدت 3 ساعات مش قادر ارد علي اي تليفون
انا وعم حلمي شعرواي ونجيب جويلي والدكتور زهدي وخالد حواس كنا جنبها بأقل من مترين
لكن ارادة ربنا نفذت وحشت قلبي علي اجدع بناتي
ولغاية دلوقت مش عارف لو شفت بلال هاقدر اوجهه ولا لأ
