جريدة الأهرام الجديد الكندية 
مقالات مشابهة
الأهرام الجديد الكندى
كشف المحامى حمدى الحرزاوى ابن محافظة اسوان عن أكبر واقعة نصب حكومى
طفله مصريه عمرها سبع سنوات كانت تحتاج عملية زرع قوقعه فى الأذن علشان تقدر تسمع زى كل الأطفال ..الحكومه والتأمين الصحى رفضوا تحمل تكاليف العمليه والتى قيمتها تسعون الف جنيه بحجة أن الطفله عمرها ست سنوات وشهرين والسن المنصوص عليها فى القرارات المنظمه هى ست سنوات بحد أقصى …
وعلشان أسرتها فقيره وظروفهم لا تسمح اتبرع بكامل قيمة العمليه موكل عندى ( جوليو) إيطالي الجنسيه
وفعلا سافرت القاهره وقابلت المسؤلين فى وحدة زرع القوقعه وقمت بسداد مبلغ التسعين الف جنيه فى حساب الوحده ببنك مصر فرع القصر العينى .
ولكن إرادة الله لم تشاء أن تجرى العمليه وتوفيت الطفله إلى رحمة الله تعالى أثر ازمه قلبيه ….
فقمت بتقديم طلب لمستشفى القصر العينى لاسترداد قيمة التبرع …خاصه أن فيه ثلاث حالات أخرى تم تجهيزها للإنفاق على عمليات جراحيه لهم من المبلغ ده …
ولما رحت استلم الشيك فوجئت زى ما انتو شايفين فى صور المستندات أن الشيك بمبلغ واحد وثمانون الف جنيه فقط وليس بتسعين الف …ولما سألت الموظف ليه كده وفين باقى المبلغ ؟ ..أخبرنى بأن وزارة الماليه بتخصم 10% من أى مبلغ بيدخل حسابنا وذلك لحساب الصناديق الخاصه بوزارة الماليه ( يعنى حتى مش للخزانه العامه).
ولما اعترضت ..قام الموظف ادانى خطاب رسمى بالمبلغ اللى تم خصمه …
ولقيت نفسى كمواطن مصرى بيحب بلده فى قمة الاحراج والكسوف من موكلى الايطالى اللى اتبرع بالفلوس لإجراء عمليه لطفله مصريه رفضت الحكومه المصريه انها تعملها لها وكمان الحكومه بتسرق جزء من التبرع علشان يتصرف لشوية لصوص من خلال الصناديق الخاصه ….
المهم القصه مانتهتش لانى رحت البنك الأهلى علشان اصرف الشيك اللى بواحد وثمانون الف …وفوجئت بأن البنك بيرفض صرف الشيك ويقولى ممنوع نسلم الفلوس كده ولازم تفتح عندنا حساب ونحولك فيه المبلغ …وتكاليف فتح الحساب حوالى أربعمائة جنيه ..
طيب انا مش عايز افتح حساب وانا عايز الفلوس حالا علشان فيه حالات بتعمل عمليات الآن ومحتاجين الفلوس
..لا …هو النظام كده ..
طيب حد يقولى ممكن نسمى ده ايه غير أنه نصب واحتيال وتحصيل أموال بدون وجه حق وبلطجه من اللى المفروض انهم يحمونا من البلطجه ؟…
