جريدة الأهرام الجديد الكندية 
مقالات مشابهة
( اولن) .. اللاعب اعتذر وقال ماقصدت سخرية ..صح أنت قصد كلامك جد الجد ومقتنع به ..دي قناعتك وإيمانك ..بجد تحترم ثانين
(ثانين ) : قال للمسلم الطبيعي ” احتفالك برأس السنة لا يدل أنك راقي ومتحضر “..اتفق معاك جدا ..لأن التحضر والرقي أسلوب حياة وسلوك يومي نابع من جوه ..ومن الإيمان بتعاليم إنسانية جدا .. فلو أي حد اتشقلب على شجرة الكريسماس وأتصور جنب صاحبه المسيحي ولا جنب بابا نويل عمره ماهيبقى متحضر
حبيت أطمنك بس علشان تهدا نكمل ” دا بيدل على جهلك بدينك وضعف عقيدتك”
بجد عفارم عليك وأنت عرفت منين المعلومة دي وواثق أوي منها كدا..اطمنك اللي عارفين دينهم زيك
بيركبوا عربيات مفخخة يدهسوا أي تجمع مسيحي بالعالم ..أو بيروحو يفجرو لهم كنيستين
على ماقوسم ..ومستعجل ليه أعيادنا مابتخلصش ولا الجهاد بيخلص.. ماهو أحنا شغلتكوا.. مبسوط كدا
ثالثن : بتقول “من مصايب الزمن اللي ابتلينا بيها أن التخفيضات بتكون في موسم رأس السنة الميلادية والأسعار بترتفع جدا في موسم رمضان ” .
ودي برضه أتفق معاك جدا لأن كلنا عارفين وبنعاني من حالة الجشع والنصب والسرقة وغلاء الأسعار
والغش واستغلال الناس البسيطة دا غير العنف والتكدس وقلة الأدب والخناقات اللي بتزيد فعلا
في موسم رمضان بجد حرام .ومش عارفة اقولك إيه فعلا بلوة وحاجة تكسف ..تفتكر ليه يامؤمن
عموما فعلا التجار جشعين وحسبي الله ونعم الوكيل فيهم ..
رابعن : بتقول ” أنا مسلم ولا أعترف لله ولدا ..” هو فيه إيه ياقندوسي هو حد داسلك على طرف
ولا جاب سيرتك ..ولا أنتو بتفتكروا أنكم مؤمنين مجاهدين في موسم أعياد المسيحين بس ..
وبعدين هو طلع مره مسيحي واحد يعترض ولا حتى سأل على أي شيء في معتقدك ..مالوش دعوه ولا يخصه ولايهمه ولا شاغله
ولا عاوز يعرف من أساسه ..يخربيت الفراغ وعدم الثقة بجد
خامسن : الراجل يا جماعة بيتوسل ويترجي ماحدش يتمنى له سنة سعيدة ولا أي حاجة حلوة ..
ياعم يخربيت اللي يزعلك ..دا على أساس أن عيشتك وحياتك عدله ومرتاح من جواك ..ماكنتش اتهبلت كدا لمجرد مصريين
بيحتفلوا بأعياد الكريسماس..دا إيه التعاسة دي وبعدين بتعتذر ليه وأنت بتتهم الناس البسيطة أنهم مش
واثقين في معتقدهم ..طيب مانت مع أول شخطة جبت ورا فبلاش تتنطط علينا ..إحنا هنا بنشحت الفرحة
في الأيام الصعبة دي .. الإزدراء اللي بجد هو إزدراء فرحة المصريين .. كل سنة وكل يوم واحنا بنفرح
بكل مناسبة وبكل حاجة وأي حاجة حتى لو صغيرة.. ملاحظة ..الترقيم بالنون عن قصد للسخرية
المفروض لو فى حكومة عادلة فى مصر والنادى الأهلى أنها تنهى العقد اللى بينهم ويتم طرده من مصر ويمنع من الدخول إلى الأراضى المصرية
هو بيحذوا حذو اخواته المجاهدين المصريين من أمثال ابوسبيع وعبدالله رشدي