جريدة الأهرام الجديد الكندية 
مقالات مشابهة
من أكثر من خمسة وعشرين سنة كنت عضو نادي السينما في معهد جوته
وكل أسبوع تقريبا كنت بروح اتفرج على أفلام واتذكر في مرة عرضوا أفلام قصيرة
لشباب مصريين هواة ولفت نظري ممثل نحيل بشعر اكرت لأنه كان يشبه الشباب العادي جدا
يشبه سواق الميكروباص ويشبه عامل المحارة والصايع اللي واقف على الناصية بمطواة الشاب
دا كان باسم سمرة وتابعته في بعض الأعمال بعد كدا اللي كانت متفاوتة في القيمة
بس عموما كان بيزداد نضجا وتألقا لحد ما شوفته في العتاولة وبقى هو أكثر ممثل انتظر مشاهدة
لأنه قادر يخطف الكاميرا من اي حد في ناس بتشبهه ب عادل أدهم بس اظن في فرق كبير
لأن عادل ادهم في جواه حتة برنس يعني مهما كان شعبي تحس أنه أعلى من الدور.
وعي مثقف بس لابس جلابية لكن باسم مش بيتحرك قوي بثقافته لكن بغريزة التمثيل نفسها
اتخلق يكون ممثل.
ودا مش تقليل من عادل ادهم اطلاقا.
بس الكراكتر عند عادل ادهم فيه بذرة ثقافة وفكرة متعالية
وفيه نحت محكم نسبيا الكراكتر عند باسم فيه ارتجال شوية وغريزي اكتر باسم بروحه البراوية
بيفضل حاضر شوية
وبسخريته وميله للصمت يعني يظل موجود كباسم رغم فعل التقمص هو اللي بيلبس الشخصية
مش هي اللي بتلبس هب يضيف لها اكسسورات زي النضارة والشنب والملابس الغريبة.
وبطريقة مش منضبطة.
بمعنى انها تنفع لمجرم ولمدرس عربي عادي وبيضيف لها لزمات
كمان مش متوقعة يعني غالبا باسم مش بيقلد شخصية لها بالضرورة وجود فيزيائي في الواقع
بقدر ما بيخترعها هو بيشوف هو حابب يلعبها ازاي وهو مرتاح حتى كتابة اسمه على التتر
هل يكون بعد السقا (النجم المفترض) ولا بعد طارق لطفي (الاقدم منه على ما اظن)
اعتقد باسم قالهم خلوني آخر اسم عادي لثقته انه جمهوره عارف هو مين
