جريدة الأهرام الجديد الكندية 
مقالات مشابهة
قالوا “ان الفرصة بتيجي للانسان مرة واحدة” والحقيقة انا مش قادرة اتحقق من صحة هذه الجملة، لأن في أحداث بتحصل معانا أو مع غيرنا بتقول أن الفرصة ممكن تيجي أكتر من مرة لكن، الفيصل في الأمر دا هو للشخص اللي بتدق الفرصة بابه.
في بطولة الأمم الافريقية لكرة القدم، شوفنا مفاجآت كتير لفرق كبيرة خرجت من الادوار الأولى، وفرق كانوا بيتوقعوا خروجها عافرت وكملت، لكن حقيقي وقفني فرصتين حصلوا لفرقتين، مصر وكوت ديفوار
مصر اتعادلت في المجموعة الاولى في كل مبارياتها وكان مصيرها الخروج، لكن الفرصة جاتلها وصعدت
لكن لم تستغل الفرصة بالشكل المطلوب، كوت ديفوار كانت في نفس موقف مصر، لكن كوت ديفوار
فازت بالبطولة، مصر اخدت فرصة وكوت ديفوار اخدت نفس الفرصة، مصر خسرت وكوت ديفوار فازت.
وراء المكسب والهزيمة ليس فقط التدريب الجيد، أو التشكيل الجيد، ولكن الروح والإصرار
وانتهاز الفرصة بطريقة تليق بيها.
كم مرة جات الفرصة لحد عندك وماعرفتش تستفيد بها ؟ كم مرة ندمت على الفرصة وقعدت تبكي حظك؟
الفرصة يمكن بتيجي فعلا مرة واحدة، لكن الإنسان الذكي هو اللي يأخذ الفرصة اللي تناسبه ويستفيد بها
ويطوعها لخدمته كمان، عشان مفيش فرصة بتيجي كاملة أو بتمشي لوحدها، الفرصة هي باب بيتفتح وأنت يا أما تكمل وتدخل وتعافر وتنجح، يا أما تبص على الباب المفتوح يمكن الفرصة تخرجلك منه جاهزة.
كل يوم عينك بتشوف فيه النور هو فرصة، والشاطر هو اللي ينحت في الصخر عشان يلاقي الفرصة، الفرصة مش بتيجي وأنت نايم على السرير، لكن بتيجي للي بيتعلم ويشغل ويخبط على كل الأبواب، ويتطور من شخصيته
وأداءه وأسلوبه ويزود مهاراته، الفرصة بتيجي مع المعافرة والمثابرة والصبر والاصرار، وهنا اوعدك لو راحت منك فرصة هايجيلك بدالها عشرة، خلينا نقرأ بعض الاقوال عن الفرصة
“يخسر الناس معظم الفرص التي تواجههم لأنها تأتيهم دائما بملابس العمل , فلا توجد فرص مجردة من الجهد إلا في الأحلام ولا يقابل الفرص في الأحلام إلا النيام” توماس اديسون
“لا تنتظر أن تسنح لك الفرصة غير العادية، بل إنتهز الفرص العادية وإجعلها عظيمة” ابراهيم الفقي
“هناك دائماً المزيد من الفرص للتصحيح، لصياغة حياتنا بالطرق التي نستحق أن نعيش بها.
لا تبدد وقتك تلعن الفشل.
إن الفشل معلم أعظم من النجاح.
أنصت، تعلم، انطلق” كلاريسا بنكولا
النجاح قيمة مهمة جدا بس عمره ما جه لحد على طبق من فضة، واللي بيجي سهل بيروح سهل، يمكن يكونوا النجاح والفرصة وجهان لعملة واحدة، وممكن يكون الفشل والنجاح برضه وجهان لعملة واحدة صادفتهم الفرصة
توماس اديسون مثلًا نجح بعد مرات عديدة من الفشل، عرف يخلق من فشله فرصة ينجح بيها ويخلي الناس تفتكره لغاية النهاردة مش بس لأنه اخترع المصباح، لكن لأنه عافر وما خلاش الفرص تروح منه لكن مسك فيها
وحاول وما استسلمش للفشل ولا لضحك الناس وتريقتهم لكن نجح ورفع رأسه لفوق ورفع قيمة النجاح بعد الفشل.
يمكن الوقت صعب، ظروف اقتصادية صعبة، اسعار بتغلى، عشان تتعلم وتاخد كورسات محتاج مبالغ، لكن دائما بيبقى في باب موارب ينفع تدخل منه وتأخذ فرصتك وتنجح، ما تستعجلش النجاح لكن خلي عندك اصرار أنك تنجح.
