جريدة الأهرام الجديد الكندية 
مقالات مشابهة
دي ياسادة بعض من العناوين الرئيسية الفاضحة واللي هزت إيطاليا كلها من كام يوم في مصيبة مخجلة وجريمة فاجرة باغتصاب فتاة إيطالية قاصر١٣سنة قام بها في وش العدو سبعة مصريين ..أيوه مصريين .. واللي هز إيطاليا كلها وطالب فيها نائب رئيس الوزراء الإيطالي بضرورة الإخصاء الكيميائي للسبعة مصريين
في وش العدو ..ودي بالحق أقل عقوبة ممكن تتنفذ في حالة انطلاق السعار الجنسي اللي بيهدد أمن وسلامة الناس في الشوارع وفي بلادهم كمان ..شوفتو فجر وسفالة أكتر من كدا ..! وفي عز الأزمات يا مؤمن اللي بتمر بيها البلاد يطلع علينا شوية حثالة معدومين الكرامة هربوا من مرارهم الطافح في مصر على إيطاليا دوغري
وبدل مايلموا نفسهم و يشوفوا أكل عيشهم ويبقوا بني آدمين عندهم نخوة وكرامة راحوا يطبقوا
ثقافتهم اللي في دمهم وناقحة عليهم واغتصبوا بنت صغيرة كانت مع صديقها في حديقة عامة وجرجروها على مكان المراحيض .. ومن الانحطاط والسفالة والهياج يا سادة أجبروا صديقها يشوفهم
وهم بيتناوبوا على اغتصابها أمام عينه ..دا أيه الشرف دا كله ياولاد ..شرفتوا الناحية كلها ياولاد ..
بقا دا اللي سيبتوا مصر علشانه وبيعتوا اهاليكم اللي وراهم واللي قدامهم وخاطرتوا بحياتكم في هجرة
غير شرعية علشان تغتصبوا بس ..دا ايه الهدف العظيم دا يا ولاد ؟! ياتري العالم بيقول علينا إيه
والعناوين كلها بتشاور على سبعة لمؤاخذة مصريين ؟! بس المهم أوعوا ياولاد تكونوا فوتوا فرض ولا تكونوا عصيتوا ربنا وأكلتوا لحم مش حلال والعياذ بالله أوعوا كله إلا المعصية .. طبعا العيال دي من ضمن أجيال تم نسفها تماما ..عيال عبارة شوية جثث بيحركها سعارها الجنسي بس
دول نتيجة تربية الدروشة وحرمانية كل شيء إنساني ومهذب ..يعني انعدام الاخلاق تماما ..يعني أيه بنت بالنسبة لهم هي فرصة للتحرش والاغتصاب فما بالك بالأجنبيات وفي بلادهم كمان .. اللي مقتنعين انهم سهلين وماشين لمؤاخذة وما بيقولوش لا ..وكمان مش من حقها ترفض أو تعترض ..يعني عيال طالعة جاهزة ومخلصة
دا إيه الفجر دا ياولاد .. لأ بجد شرفتوا نواحي الكفر كله ورفعتوا راس أهل البلد كلها ياولاد ..وخليتوا سمعة البلد زي الفل .. يبقا لما يكون المطلب في الشارع الإيطالي هو إخصائهم محدش يفتح بؤه ويعترض .
ماهو اللي ماترباش في بلده تربية البلاد اللي بتحترم شعبها وبتعرف تجيب حقهم ودا أقل واجب مع الحثالة دول واللي حطوا صورة مصر باستهانة في موقف مهين ..وياريت يتطبق في مصر علشان نلم حالة الهياج اللي طفح في الشوارع برا وجوه ..
* كام نقطة *
هل تناول إعلامنا هذه الكارثة الفاضحة بحزم واللي قلبت الشارع الإيطالي كله ووقف على أسباب هذه الجرائم اللي للأسف اعتدنا عليها في بلادنا ..ولا الموضوع بقا عادي وإيطاليا هي اللي كبرت الموضوع ..
* كل العناوين الرئيسية (سبعة مصريين قاموا باغتصاب …) يعني فضيحة في مقتل
* بلاش ندفن راسنا في الرمل ونأخذ القضية في سكة مشاكل الهجرة الغير شرعية ونرغي فيها وكأن دي القضية الأساسية لا ياحضرة المسؤول المصيبة الكبيرة هي الجريمة الأخلاقية الفاضحة اللي تمت برا وعلمت علينا جوه *
منذ أعوام عارضتني بشدة إعلامية كبيرة لما طالبت بإخصاء أي مغتصب يدمر حياة أي بنت وكانت حجتها ان دا يسبب عاهة مستديمة له وضد حقوق الإنسان .. وأكرر لها سؤالي تاني خاصة وبعد ماعدينا البحار ..وهل الاغتصاب لا يسيب عاهة نفسية مريعة ومستديمة للفتاة واسرتها
ومن الصعب بل من المستحيل تخطيها أو الشفاء منها إلا بالموت أو الانتحار أو بمعجزة من السماء
فين هنا حقوق الإنسان في انتهاك جسد البنات ..
الإخصاء هو الحل لردع والقضاء نهائيا على الحثالات..
