كلنا بنمر بتجارب نفسية كتير ، احنا وناس كتير حوالينا أكيد بنتعرض لمواقف وأحداث ممكن تضعفنا لأننا
في الأول والآخر بشر، وبنبقى محتاجين حاجة تساعدنا ولو بسيطة ترجعنا نتعافى من العلاقة السامة اللى كنا فيها خصوصا لو كانت ارتباط .
أصل مش هنفضل قاعدين نبكي على الأطلال ونغني هايجيلى موجوع !! ومع كل التجارب النفسية السيئة
اللي كتير مننا بيمر بها، بنحاول ندور على أي حاجة تساعدنا نخرج من اللى كنا فيه .
أو نبدأ نشوف طريقة تخلينا نتوقف عن حب الشخص ده؟
أكيد هتحتاج توقف نبع الحب اللي فايض منك تجاه شخص مش مهتم بيك أو بيتصرف تصرفات
مش عجباك أو مش بيحبك أصلا أو كنتوا فى علاقة و سيبتوا بعض .
علشان كدا هانحاول Move On تانى من العلاقات اللى زى دى .
أهم وأول حاجة أنك تكون شجاع مش هاقولك إن الحياة بمبة و لذيذة وبكره أحلى وبتاع ، لكن ده خيال ممكن مايبقاش له مكان على أرض الواقع، لكن خلينا نكون بنفكر بشكل واقعى أكثر لو مثلا في علاقة “فريندزونيه”، هل أنت في Friend Zone؟ إجابتك نعم Of Corse ؟
طيب خلاص أنت كده أدركت ، ولو أنت مع شخص بيأذيك ، ممكن تصرفاته دي تساعدك على إنهاء العلاقة
وتتغلب على مشاعرك.. يعني أبدأ خد العلاقة من منظور جديد و أتعلم تقول لا و أنك مش هاينفع تضغط نفسك وتستمر فى العلاقة دى أكتر من كدا و من غير تجريح ولا اهانه للطرف التانى .
اولا .. تشوفلك حد بتثق فيه وتفضفض معاه “أهم حاجة يكون سالك من جوه وبيحبك بجد ” أنكم تفكروا سوا ويا سلام بقى لو كان حد متخصص يساعدك فى إتخاذ القرار الصح .
![خلصانة بشياكة](https://www.ahram-canada.com/wp-content/uploads/2024/02/6-1024x857.jpg)
ثانيا.. خد وقتك ، الموضوع مش زرار هتدوس عليه ولكن مع خطوات هتفضل تاخدها وتستمر فيها وده هياخد وقت ومش مهم وقت طويل ولا قصير ما تستعجلش ، المهم إنك توصل للنتيجة النهائية اللي أنت عايزها والهدف منها هو إنك تسيطر على مشاعرك و أفكارك .
ثالثا ..اتعلم من تجربتك اللى مريت بيها كويس آظن عرفت أنت عايز إيه ومش عايز إيه.. ،المستقبل أكيد هيبقى أحسن وممكن تكون مع شخص تانى أفضل من اللى فات، وركز على الأخطاء اللى وقعت فيها المرة اللي فاتت عشان ماتكررش نفس التجربة.
رابعا.. عايزين نعدي بقى المرحلة دي إنك لو فضلت حاشر نفسك مع شخص مخلي العلاقة مؤذية والشخص نفسه مؤذي، أو في علاقة مع شخص مش بيحبك، ده ممكن يخليك ماتحسش بالسعادة مع أي شخص تاني هتقابله وخلال رحلتك في الـ Moving on أتعرف على ناس جديدة ده ممكن يخليك تشوف ناس أحسن من شريكك السابق و تعدى من المطب العالى الى وجع قلبك دا .
بقولك آية . ممكن تكون من جواك فاكر خلاص أنك جاهز نفسياً على تجاوز الشخص ده و تقول خلاص نسيتك
و كأنك ماجيت ، لكن مش معنى كدا انك تفضل تقلب بقى فى الرسايل القديمة و الصور اللى بنكم و الذكريات ،ولا تنزلى صور على مواقع التواصل الاجتماعى وانتِ بقى ب New Look المطرقع و لا مصور نفسك فى ال Gym و انت بتعمل الفورمة الجديدة ،،، او تنزل story لا فوق بقى و خليك فى حالك 1000 مره هاقولهالك ؟! ، دى مش تصرفات ناس ناضجة و شيك كدا يا عزيزى..
طيب لو احنا فى شله واحدة ، شغل واحد او من عيله واحدة و بنخرج مع بعض … اعمل اية ؟
وقف ياسيدى الخروج وشوف ناس تانية تخرج معاها، الحفاظ على الصداقة شيء مهم طبعا وبيدل على نضج الطرفين ولكن مش دلوقتي، ماتبوظش اللي أنت بتعمله أعمل حاجة بتحبها ممارسة رياضة مفضلة أو هواية
ركنتها على الرف .
عارف هاتلاقي مشاعر الحب و التفكير فيه بتتلاشى مع الوقت، أشغل نفسك و أفكارك بالطاقة الإيجابية مع الناس الفرفوشة ، عارفة إنها مش سهلة و مؤلمة لكن وجع ساعة ولا العمر كله يا عزيزى…و لا اية !!؟
في النهاية يا جماعة، لازم نقول إن العلاقات مش لازم يكون فيها حد وحش وحد كويس، ممكن تكونوا إنتوا الاتنين كويسين بس مش هتقدروا تتعايشوا سوا، وإنه أكيد لو شخص مابادلكش نفس الشعور ده مش معناه إنه وحش
أو أنت لا سمح الله وحش برضو، وفي الحالتين، أي وضع في أي علاقة مش هتريحك لازم تبدأ تغيره مع الطرف التاني.
اتناقش فى المشاكل و الأحاسيس اللى بتحسها بالتفاهم و ابدأ دايما كلامك ب أنا مش أنت ( أنا مضايق من التصرف الفلانى ) مش ( انت عطول بضايقنى ) بلاش قلب الترابيزة دا .
يا إما تبدأ تاخد خطوة إنك تـ Move on من العلاقة دي من أجل صحة نفسية أفضل اللي هي رقم 1 بالنسبالك وأهم من أي شيء وأي شخص.
مريم توفيق
ماجستير فى الصحة النفسية و الأسرية و التربوية
دبلومة العلاج المعرفى السلوكى
مدرب معتمد للأطفال و المراهقين
![الصحة النفسية](https://www.ahram-canada.com/wp-content/uploads/2024/01/4-3.jpg)