جريدة الأهرام الجديد الكندية 
مقالات مشابهة
أيام بتقرب من سنة بتمر من بين إيدينا ولا حد يقدر يوقف منها حتى لحظة.. يمكن دي أكتر سنة عشت تفاصيلها بدقة ..كانت سنة مختلفة ..واضحة وقوية وصوتها عالي .. ٣٦٥ يوم أحداث كتيرة ومتنوعة ومش مترابطة وأحيانا متشابكة ومقعدة ..تلاقي نفسك في ظروف أنت مش عاوزها
ولا يمكن تتخيل أنك الوحيد اللي لازم يبقى موجود في الظروف والأحداث دي ..كل الأمور بتحطك في مواجهة مع الواقع بكل ثقله لكن فعلا مافيش غيرك وصعب جدا تتخلى رغم المرارة وفجأة تلاقي نفسك بتتعامل مع أصعب المواقف وأقسى ناس وأحط ناس برضه ..ومطلوب منك التخطي والاتزان والانجاز على أكمل وجه ..وتدخل في صراع من الغضب أو الرفض لكن للاسف بيكون مش وقت تصفية حسابات وتتعلم أصعب درس فعليا
الهدوء..التقبل ..التسامح ٣٦٥يوم في انتظار هدنه للتنفس واستعادة القوة ..ماحصلش .. ووسط تفاصيل كتير مؤرقة وصراعات مزعجة فجأة يغيب أدام عينك أغلى الأصحاب والأحباب ..واحد ورا التاني ..أحباب كتير أوي في قمة قوتهم وصحتهم ونجاحهم ..فجأة راحوا..وتسأل هو فيه إيه وليه ؟.. طيب خلي بينكوا حتى مسافة نستوعب
لكن ولا حتى تفسير واحد يقنعك..ولا إجابة شافية .. ناس مشيت أدام عنيك من غير ما تسامح .. وناس مشيت وهي بتترجي اللي يسامحها ..تصفية الحسابات والمواجهة بتكون قاسية وشريرة جدا في التوقيتات المصيرية كوقت الإحتضار .. وناس مشيت ومالحقتش تقول الحقيقة وراحت بالسر الخطير
وناس مشيت وهي فاهمة حاجات كتير غلط في حق ناس تانية اتظلمت .. وناس موتهم كان انقاذ للموقف.. وناس مشيت من نص الطريق ..وناس مشيت وماحد قدر يتعرف عليها
وناس مشيت من غير حد مايخبط على بابهم ويكتشفوا غيابهم في سيارتهم ..وناس مشيت من رعب الوحدة ومواجهة الموت بمفردهم فعليا .. وناس فعلا مشيت من القهرة
وناس الموت كان عزيز عليهم
وناس أخدت قرار الموت فجأة بجرعة زيادة وكانوا لسه من شوية معانا وضحكتهم ماليه الدنيا
وناس اغتالها الموت من غير ترتيب ..وناس وناس .. غابوا ومهما كانوا قريبين بتفضل الحقيقة
في قلب كل واحد منهم بس ..الله وحده بس اللي يقدر يقيم الأمور بالحق وفهمه للتفاصيل
وللنوايا والحقايق الغياب غير المتوقع بيعلم فينا بمرارة
يغرس فينا حاجات ماكنا بنتعامل بيها قبل كدا ..بنفهم اكتر ..بنكون صبورين وبالنا أهدا
باختباري فتشت تاني جوايا بدقة وبرضه لقيت نفس الدرس قدامي ..التسامح في الحياة ضرورة لامحالة وبسرعة
هو صعب لكن فعلا بيعطي طاقة وقوة جبارة وبتلاقي جواك عمق ونضج بيفرحك وبتشوف الحياة أحلى فعلا
” الحياة لانسير ولاتنمو من دون التسامح ،” بداية سنة جديدة بقلب لين وطول بال وتسامح حقيقي
