جريدة الأهرام الجديد الكندية 
مقالات مشابهة
حقيقي الوقت دا بنسمع نصايح غريبة الشكل على كافة المستويات،
والمنصحين كتروا وعملوا لنفسهم شهادات،
وبنصايحهم دي ضيعوا كتير اوي رجالة على ستات
الحقيقة كل يوم بنكتشف أننا بناخد رؤوس عناوين للحقوق، سواء بقى حقوق المرأة او الأبناء أو الموظفين، وبننسى تمامًا الواجبات، بننسى ان زي ما لينا حقوق علينا واجبات، وزي ما عندنا “ودان” نسمع بيها، عندنا عقل نفكر بيه ونزون الكلام ، اصبحنا بناخد اللي عايزينه ونسيب الباقي، والكلام دا بقوله ليه؟ لإننا في الوقت الاخير بنشوف على صفحات السوشيال ميديا نصايح مالهاش اول ولا آخروالغريب
انك تلاقي النصيحة وتحت منها اسم شخص يسبقه حرف د/ ، لا طالما دكتور يبقى لازم نسمع كلامه اكيد طبعا مش دكتور يعني متخصص يعني ضليع في اللغة العربية واصول اللغة العربية الله يرحمك يا سليمان بك نجيب دي جملته في فيلم غزل البنات، وناخد النصيحة زي ماهي نطبقها، بصرف النظر بقى عن اختلاف الشخصيات، والطبايع ،
واختلاف النشأة والتربية، وكأننا مش عايزين نفكر خلاص احنا في حد تاني فكرلنا فتمام على كدة الموضوع خلص، يعني مثلا تلاقي قصة سيدة اتعرضت للخيانة أو العنف المنزلي فكتبت نصيحة عامة وكإن كل الرجالة بتعمل كدة ولازم نرجمهم، وتقول مثلا ان جوزها قبل ما يخونها كان بيجيبلها هدية، تلاقي يا حرام اي ست جوزها يجيبلها هدية الفار يلعب في عبها وتقول بس دا اكيد بيخوني دي فلان الفلانية مأكدالي، ونفضل بقى في الدايرة دي لغاية ما الست يجيلها انهيار عصبي او الراجل يخونها بجد.
طبعا في ناس كتير درسوا واتعلموا واصبحوا كُفْء لإعطاء النصايح ومتابعة اللي محتاج رأي او مشورة، لكن انا عتابي على الناس اللي بتركن عقلها وتخلي غيرها يفكرلها، عتابي على الناس اللي عايزة تبقى زي غيرها من غير ما تبص لظروفها، عتابي الاكبر على سيدات كتير صرفوا النظر عن اولادهم ومستقبلهم وعن تطورها هي الشخصي بالمناسبة وفكرت ازاي تغيظ جوزها او تغيظ فلانة او علانة.
يا سادة، كل حد فينا ربنا اداله ميزة، اداله موهبة، اداله امكانيات بتاعته هو بس، لو فكر وركز ازاي ينميها ويكبرها ويطورها هيكسب كتير، كل حد فينا حياته مش زي التاني صوابعك مش زي بعضها، السيدات بالذات كونك انك
قررتي ترتبطي وتتجوزي يبقى لازم تتحملي تبعات الامر ومسئولياته خصوصا في مجتمعنا يعني ما نقولش الست في كوالالمبور مش هي اللي مابتطبخ مالناش دعوة يا موههي، احنا هنا في مصر لينا ثقافتنا وعادتنا مش بقول كلها صح وبقول في حاجات كتير لازم تتعدل او تتغير لكن بلاش الاساسيات البيت والاولاد مسئولية الراجل والست بس الست هي رمانة الميزان، ماتسمعوش كلام يخرب البيوت وركزوا انتوا بتسمعوا من مين وهدفه ايه فلتروا النصايح، ربنا يحي بيوتنا ويحفظها
