جريدة الأهرام الجديد الكندية 
مقالات مشابهة
رامي كامل
هشام قاسم صحفى و ناشر و سياسى و ممكن تبحث عن تاريخه على الانترنت هتلاقى مصادر كتيرة بتتكلم دوره فى الصحافة المصرية .
هشام قاسم أسس التيار الحر و أنا كان ليا انتقادات كتير على التيار الحر كتبت بعضها وانسحبت بعد دعوتى للمؤتمر التأسيسى وكنت شايف الشلة جوه التيار وكنت شايف ان كتير من الجالسين على طاولة تأسيس التيار ماسعدهمش الحظ يقروا سطرين فى الليبرالية.
اما هشام فهو شخص مؤمن أن مصر محتاجة تؤسس للتجربة الليبرالية المصرية وأنها تركز على البناء الاقتصادى و تحرير السوق و دعم التنافس و ده بالضرورة بيجيب معاه الحريات العامة و الحقوق الفردية والجماعية.
من بداية ظهور هشام قاسم تحديدا بدأ الهجوم من القومجية بأن هشام بتاع الامريكان و مع التطبيع و ضد ثوابت الامة.
الغريب ان اللى خرجوا بالدعوات دى ناس مصريين من أصول فلسطينية اللى دافع عن حريتهم دول غربية بينها امريكا و أهلهم لحد دلوقت حساباتهم فى اسرائيل بالشيكل.قضية فلسطين مش من ثوابت الأمة ، قضية فلسطين قضية سياسية مهمة للدولة المصرية لكن فكرة ثوابت الأمة ده فرض على مصر للتفرغ للقضية دى دون غيرها لكن الواقع انها قضية من قضايا كتير ولو على ثوابت الأمة فنهر النيل أهم عند الأمة المصرية وقضية بناء القدرات المصرية صناعيا و زراعيا و تكنولوجيا من ثوابت الامة المصرية قبل فلسطين.
هشام قاسم مخرجش يدعو و يبشر بالتطبيع ولا يقول ان مصر تتباع للغرب انما هشام اراد لوطنه الخيرهشام ناقش الاقتصاد و طول الوقت بيؤكد ان الحل اقتصادى وأن التغيير السليم فى مصر هيحصل ببناء اقتصاد قوى ليبرالى.
اللى بيحصل دلوقت مع هشام مؤسف و اتمنى يخلص قريب واتمنى ان عقلاء الدولة يراعوا أن ده معارض ليبرالى مؤمن بالتغيير عبر الاقتصاد و الليبرالية وان وجود الليبراليين فى الشارع السياسى و فى الوسط العام مهم جدا
