جريدة الأهرام الجديد الكندية 
مقالات مشابهة
لما تلاقي أي تنويري ينتقد التراث السلفي وبيحط نفسه في مواجهة شرسة مع الفكر الوهابي وينصفك انت كمواطن مصري تعاني فعليا من عبء هذا التراث القهري في بلدك وأحيانا يستشهد بكلام السيد المسيح فدا مش معناه أنه هايبقى مسيحي فبلاش الانجراف بالمشاعر وتبالغ في انبهارك بنقده للتراث وتفضل قاعد مستني اللحظة اللي يتنصر فيها لمجرد النكاية فقط في المسلمين السلفيين وهو في حقيقة الأمر مش مقتنع بعقيدتك أصلا لأن دا شأن يخصك وحدك ولا يعنيه في شيء
في حين أنه لما يجي ينتقد معتقدك أو حتى يناقش تصريح لأي من الأباء تقوم فورا تقلب الترابيزة عليه وتتهمه بالشيطنة والعمالة وأنه مدسوس وسلفي حتى النخاع .. يا عزيزي.. التنويري الحقيقي مشروعه الأول هو المواطنة وتطهير التراث الديني لأنه ضد الإنسانية وضد مدنية الدولة وضدك انت شخصيا لمجرد الاختلاف في المعتقد
فرجاء كونوا أكثر وعيا وتروي وفهم
تاني حاجة وتخص أكثر البعض من القبطيات.. مش أي حد على الفيسبوك لمجرد أنه حط صورة لأي قديس وقاله آيتين وسمى نفسه أبونا فلان نقبل صداقته ونرغي على الماسينجر في أمور عائلية وشئون خاصة بحجة أنه أبونا وبركة وحافظ الأنجيل كله ..طيب ماهو مافيش حد حافظ الكتاب المقدس عن ظهر قلب أد ابليس نفسه
وبعدين ماتفتحوا انتو الكتاب بنفسكوا وشوفوا المسيح بيقول ايه ..ماهو زي ما بيقول لأبونا بيقولكوا انتو كمان
فرجاء بلاش التصرفات غير المسؤولة والمستهترة لأن عواقبها وخيمة على البيوت خاصة بعد كشف زيف الكثير من الكذبة اللي ادعوا أنهم كهنة ..
ثالث حاجة..لبعض الشباب القبطي المتحمس ..رجاء بلاش الغيرة المندفعة اللي بتاخدك لمهانة الجروبات اللي هدفها استفزازك وماعندهمش غير السؤال اللوزعي الساخر إزاي ياقبطي بتعبد ثلاثة آلهة …وإزاي تعبد خشبة
وتقوم حضرتك تتطوع وتعمل فيها سبع رجالة وعاوز تؤكد له أنك مش مشرك وخاصة لو مش ملم كويس بالكتاب المقدس ولا بحد بسيط من اللاهوتيات .طيب يبقى إيه الهدف ..،؟!
لا أنت هاتقدر توضح له ولا هو هايفهم ..مش خوف لكن خليك واثق من إيمانك وماتنزلش لمعركة حمقاء وسيجال غبي (اما المناقشات الغبية فابتعدوا عنها ) واتصرف بشكل يليق بابن ملك وترفع بإيمانك وبمسيحك بعيد عن الإنجراف والزلل أرجوكم تحلوا بالنضج والحكمة والسلام اللي يفوق كل عقل
