جريدة الأهرام الجديد الكندية 
مقالات مشابهة
أحمد العراقي
من أربع سنين كده كنت يدوب بحاول اتلمس العتمة في العمل الخدمي والمجتمعي وذات يوم كلمني احد الاصدقاء انه عاوز يعرفني على ناس مهمين ( اوي اوي اوي) من مصر (القاهرة) جايين زيارة الاقصر ( أنا من النوع اللي بحب ديما امشي ورا الكداب لحد عتبة الباب)
ورحنا نقابل الناس دول اللي مقابلتهم خير كبير ليا ( على حد وصف صاحبنا) وفي أحد الكافيهات الفخيمة جلسنا نحتسي القهوة ( نرجع للعامية) .. كانوا تلاتة لابسين بدل وكل واحد حاطط دبوس في الجاكت يحمل اسم (….) مش مهم الاسم ومشبك دبوس للكرافتة ( الظاهر كان في عرض على ال٣) نفس اللون الدهبي ونفس الشكل
المهم انا ما اعرفش ليه لما بشوف الكرافتات الطويلة دي والمشبك الدهبي بيبدأ الفار يلعب في عبي … وبرضه قلت خلينا ورا الكداب بدأوا حديثهم بقى يعرفوا بعض ( جناب السفير الفلاني والسفير العلاني والدكتور الفلتكاني ولا تقول كاني ولا ماني ولا دكان الزلباني) بدأت هواجسي تزيد واللي بتوقعه بيتحقق
وطبعا لا دي طريقة ولا أساليب سفراء ولا دي خلفية ثقافية لبياع جرايد حاصل على الابتدائية.. هنا ايقنت أن في ملعوب وبدأت اندمج وانسجم وتعييرات المفاجأة تعلو قسمات وجهي وانبهاري بالألقاب والمقامات ينعكس كضوء الشمس على نحري ( ما قولنا بلاش فصحى)
المهم يا سيدي قالولي شكلك ذكي وطموح مع اني ما اتكلمتش حرف لسه ( بس الظاهر الناس دي عندها كشف غيبي) وعشان كده هتكون مسئول الحملة ( الاسيوافريقية) في محافظة الأقصر وهنطلع لك كارنيه زي دول
( وواحد منهم الدكتور غالبا طلع لي اربع او خمس كارنيهات) وكل شاب هينضم للحملة هيطلع لع كارنية
( بغض النظر ان الكارنيه معمول فوتوشوب واللي عامله واحد بصمجي باين واول مرة يتعامل مع كمبيوتر )
لكن برضه شافوا ابتسامة الفرح تعلو وجهي قالوا نطمعه اكتر
( وراح جناب السفير اللي هو مش سفير قاطع الكلام .. انت تبقى منسق ومسئول الحملة في اقليم الصعيد كله)
وأنت اللي هتنسق المؤتمرات والفاعليات والندوات والانشطة الخ.. الخ.. الخ قمت رديت بكل طيبة وحسن نية وسألت سؤال “ظاهره فيه الرحمة وباطنه من قبله العذاب” هو مين هيصرف على كل ده ..!؟
رد الدكتور اللي مش دكتور وقال كل الانشطة من اشتراكات الاعضاء وهنا ( بدأت اكشف عن وجهي الحقيقي)، اعضاء مين..!؟ = اعضاء التحالف اللي انت هتجمعهم عشان يشاركوا معانا
ودول هيدفعوا كام..؟ = رسوم الكارنية ٢٥٠ جنيه وزيهم للتجديد سنويا.. ثم استطرد ( ولازم لحد بكرة تكون جمعت على الاقل ٢٠ عضو والا هنضطر نسند المسئولية لحد غيرك – هنا قاطعه السفير الاوسط اللي هو مش سفير ياريت بسرعة عشان حجز الفندق .. (( نعم ))
الدكتور بسرعة ( جناب السفير بيهزر) وينظر له نظرة كلها غضب … أيه قلت ايه.. ؟
قلت موافق طبعا بكرة يكون عندكم اشتراك ٥٠ عضو. – السفير.
الكبير الكبارة ( عاش يا بطل ) بس بكرة قبل المغرب عشان مسافرين بالليل
العصر يا جناب السفير يكون عندك صور البطايق والاشتراكات تاني يوم العصر صاحبي اللي مابقاش صاحبي بيرن عليا كتير.
( وبعد عشرات الرنات رديت ياعم فينك الناس بيرنوا عليك من الصبح ورنوا عليا كذا مرة ..!؟ أنا.. ناس مين انت بتصدق دول شلة نصابين وأوعى تجيب لي سيرتهم تاني … نما الى علمي فيما بعد أن احد الشرفاء من أبناء الاقصر دفع لهم ما تبقى عليهم من ايجار الفندق ونصحهم بعدم تكرار الزيارة
وبالهنا والشفتشي ..
