جريدة الأهرام الجديد الكندية 
مقالات مشابهة
يمكن عنوان المقال يبان إنه مضحك، لكن هذا هو الواقع يا سادة، فمذيعات التليفزيون سابوا المشاكل التي تؤق المشاهدين واتخانقوا على الرجالة
واحدة تقول دا شيطان رجيم، والتانية ناقص تقولنا اننا نرقصلوا على اغنية لما بدا يتسنى زي هارون الرشيد، واحدة تقول ارجموا الرجالة والتانية تقول افرشوا فساتنيكم الغالية يمشوا عليها، والمشاهدات بقى انقسمن الى الى قسمين اللي مخنوقة من جوزها وبتكره الصنف كله رايحة في ناحية انه شيطان رجيم، واللي جوزها مهننها رايحة في ناحية انه فرعون وهارون الرشيد ولازم نعمل تمثال لأكتافه.
هم يبكي وهم يضحك، الناس جلدها اتسلخ من الغلاء والاسعار اللي بقت زي الغول ودول في عالم موازي، لكن خلينا نتكلم من منطقهم شوية او بمعنى أدق في محتوى كلامهم اللي هو العلاقة بين الرجل والمرأة، الزوج والزوجة
وقولًا واحدًا يا سادة لا كلام دي ولا كلام دي يعمر بيوت، ليه بقى، هاقولكم ليه، لأن ربنا خلقنا متشابهين يمكن في الشكل الطول لون البشرة الشكل الخارجي للجسم، لكن لكل واحد فينا بصمة مختلفة عن التاني وطباع مختلفة وكمان ادانا عقل نميز بيه، ومعنى كدة ان الطريقة اللي ماشية في بيتي وناجحة بيها ومبسوطة ممكن جدا لا تناسب زوجة اخرى او رجل آخر، يعني مثلًا بيقولوا اقرب طريق الى قلب جوزك معدته، هل المثل دا يمشي على كل الرجالة بالطبع لا، والى آخر هذه الاقاويل اللي عشنا عليها.
طيب في مشاكل في بيوت، طبعا في مشاكل وهايفضل اختلاف الاطباع بين الزوجين يعمل مشاكل بس الزوج الناجح والزوجة الناجحة هما اللي يعرفوا يوصلوا لبعض اكيد في نقطة التقاء بين الزوجين
دا على اعتبار ان الاختيار في الاصل كان صح- ينفع الزوج يرجع خطوة لورا وينفع الزوجة ترجع خطوة لورا عشان يعرفوا يعيشوا حياتهم، والرجوع خطوة مش معناه ابدًا إهدار لكرامة ايًا منهم، لكنه بمثابة تنظيم علاقات بشكل صحيح، خصوصًا لو في أولاد بيتربوا ويتعلموا من والديهم.
تطبيق النظريات المتبعة في بيوت غيرنا دون تفصيلها على بيوتنا خطأ فادح يرقى انه يصبح جريمة في حق بيتك والكلام هنا اكتر للزوجة، ليه؟ لأنها المنوط بيها تنظيم العلاقات بالاتفاق مع زوجها، شغل البيت
–لو هي موظفة- تربية الاولاد، مذاكرتهم …..الخ، بعيدًا عن الشعارات الحنجورية، من وجهة نظري الحفاظ على سلامة بيتي واولادي بالدنيا، وهنا الكلام للراجل والست، لأن سلام البيت مسئولية الطرفين.
يمكن انا هنا بتكلم على النماذج السوية للزوج والزوجة، بلاش تسمعوا كلام اي حد من غير فلترة، شوفوا النصايح هاتمشي على بيتكم ولا لا، تنظيم العلاقات بتبقى حسب قدرات كل واحد، ويمكن نشئتنا في مجتمع شرقي فرضت علينا بعض الامور على الراجل وعلى المرأة
يمكن في حاجات غلط بس اكيد في حاجات كتير صح، في امور اتغيرت في المجتمع عن زمان يعني المرأة بقت تشتغل وتنتج ولهذا وجب التفاهم في شغل البيت مثلا او تربية الاولاد،
وفي موضوع شغل البيت في رجالة بيطبخوا حلو اوي وبيساعدوا زوجاتهم، بس في رجالة تاني مش بيعرفوا اصلا يطبخوا فبيساعدوها في حاجة تاني غير الطبيخ، المرونة والتفاهم هما التربة الخصبة للحب اللي كان قبل الجواز، اروا حبكم بيهم تعيشوا طول عمركم مبسوطين.
