جريدة الأهرام الجديد الكندية 
مقالات مشابهة
ماخلاص فتيتوا من زمان بإن أعياد الكريسماس كخة وكلها شبهات .. مش قصة كل سنة تهلوا بنفس السحنة وتجددوا تفاهاتكم وخيبتكم بشوية فتاوي لاتودي ولاتجيب لما بقيتوا مضحكة وبعدين هو كان حد طلب منكم تهنئة ولا مثلا هانعيط ونشد في شعرنا ولا احتفالاتنا هاينقصها حتة ..
لا ومستغرب أوي إزاي أختك المحجبة المحصنة بتشتري شجرة الكريسماس .. بصراحة في دي معك حق لأن الأتنين دونت ميكس خالص .. طيب خدهم كلمتين حلقة في ودنك :
ماحدش عاد بيسمع لكم زي الأول .. فيه انسحاب واضح يا مولانا ماعدا اللي قتلهم الجهل والخوف من بطشكم ودول جمهور كتير برضة ..عموما الناس خلاص عاوزة تنضف وتجرب شياكة وجمال الاحتفالات حتى لو من باب التقليد والمشاركة.. أيوه الناس طهقت من بؤس وغباء ضلالكم ..
أكتر ناس بتشتري شجرة الميلاد هم من المحجبات والدقون وانت عارف كدا كويس ..ودا اللي مجننك .. فإزاي كل سنين الجهل دي وتهزمك أصغر شجرة كريسماس ..
طيب ماوصلكش موضة أنهم بقوا بيشتروا دلوقت مذود الميلاد وبيتصورا جنبه كمان وفي بيوتهم .. لا وإيه وبيدخلوا يطلبوا مذود المسيح حرفيا مش عيسى اللي احنا مانعرفوش .. ولا عامل نفسك مش واخد بالك ..
ولا مش ملاحق ترمم الغربال منين ولا منين .. و بعدين مش عاجبك الكريسماس بانحلاله ماتتفرجش عليه من تحت لتحت ..يعني عيني فيه وأقول عليه إخيه ..
سيبوا الناس تتنفس وتعيش وتفرح ولو مرة في السنة ..بضاعتكم المضللة انتهت صلاحيتها خلاص ..
ومرحبا بالجمال والأفراح وأجراس وشجرة الكريسماس.. مرحبا بالإنسان الحر في أي مكان وبأي معتقد ..
ميري كريسماس يا مولانا
