جريدة الأهرام الجديد الكندية 
مقالات مشابهة
بسمه عطيه منصور
قرأت لك في كتاب قوة عقلك الباطن للكاتب (جوزيف ميرفي ) أن فيه كاتب اسمه (اميل كوي ) عالم نفسي مشهور حازت محاضراته علي اعجاب الكثير من أهم أفكار اميل
عندما تتضارب رغباتك مع خيالك فإن خيالك يكسب دون خلاف) سمي ما تصفه تلك العبارة ب (قانون الجهد المعكوس) يعني علي سبيل المثال لو حد طلب منك تمشي علي لوح خشب علي الأرض فستفعل ذلك دون تفكير
اما اذا وضع نفس لوح الخشب علي ارتفاع ٢٠متر في الهواء بين حائطين لن تستطيع ان تمشي عليه رغبتك في المشي سوف تتضارب مع خيالك وطبعا سياتك هتتخيل الف حدوته لسقوطك من علي اللوح
خوفك من السقوط هيخليك عاجز وواقف مكانك لا والأغرب أن كلما بذلت جهد أكبر في التغلب علي خوفك زادت سيطرة فكرة السقوط شايفك ياللي بتسأل هناك احنا مالنا بالكلام الواعر ده وبعدين يعني نسكت ومنحولش ونقف متكتفين عشان سياتك ترتاحي ؟
لا طبعا اكيد ده مش قصدي !! الخلاصة من كلامي ده أن لما يبقي امامك هدف صعب تحقيقه او انت خايف من المحاوله لازم تخلي عقلك الباطن يستوعب تحقيقه يعني من الاخر تعمل اتفاق مع عقلك كده وتختار احسن وقت بيبقي عقلك الباطن مهيمن عليك والاغلب ده بيبقي قبل النوم مباشرة
العقل الباطن بيبقي في اقصي حالات الهيمنه قبل النوم وفور الاستيقاظ في الفتره دي بتختفي الأفكار السلبيه التي تحيد رغباتك وتمنع عقلك الباطن من قبول اي محاولة ايجابية هنا تبتدي تتخيل واقعيه رغبتك وتشعر بنشوه الانجاز هنا بقا عقلك الباطن يعمل علي تحقيق تلك الرغبة
العالم كله بيعيش أزمات اقتصادية حروب وفيروسات وثورات وايام عدت علي أغلب الناس بصعوبه محدش فينا سليم ولا مرتاح للآسف كل واحد فينا لازم يؤمن بالقوة اللي جواه الكنز المدفون اللي اغلبنا مش عارفين قيمته نحاول نصدر مشهد حلو وحدوته جميلة نقنع أنفسنا بواقعية الحلم وسهولة تحقيقه نستطيع تغيير صورة العتمه اللي تواجدت بعد ارتفاع سعر الدولار مثلا اقصد العتمة الداخلية لك انت وانت بس أصل العاتمة حضرتك والنظرة التشاؤمية مغيرتش في الوضع حاجه ! ولا هترجع سعر الدهب والدولار في الارض كل الحكاية أن العاتمة اللي جواك خلتك عاجز وصدرت ليك مشهد مقبض (خلاص خلصت ) اكيد مش قصدي أن نحل أزمه الدولار بأن أخلق تناغم بين رغباتي وبين خيالي انا مش سطحية !
بس علي الاقل هحاول أنا اتقدم بخطوة تساعدني وتغير شكل المشهد الشخصي لي خد بالك من الكلام بقول لي بصورة شخصية عشان مدخلش في زون معتم يستحيل معه الرجوع عشان محدش يقولي دي عايزه تحل الأزمة بالاحلام !
عقلك الباطن هو غرفتك المظلمة هو المكان الذي تتطور فيه حياتك الخارجية أنت نتاج وتجسيد المعتقدات والأفكار داخل تلك الغرفه السرية عايزه كل واحد فيكم يفكر في حاجه نفسه يعملها ويحاول يقنع عقله كل يوم أنه قادر يعملها ويحقق نجاح فيها ويحاول يلقي أفكار إيجابية داخل العقل الباطن وشوف بعد مدة صغيرة ازاي هيقاوم كل خوف من الفشل وازاي نظرته هتتغير للأحسن من أجل أن يتغير عالمك لابد أن يتغير عقلك من الداخل الي الخارج جرب مش هتخسر حاجه يمكن تكسب شخص جديد وتجربة ممتعه
تيجوا نتلاعب بخيالنا…
