جريدة الأهرام الجديد الكندية 
مقالات مشابهة
السواقة في السويد أصعب بكتير من السواقة في مصر الطقس هنا أمطار غزيرة طوال العام وثلوج بالشتاء ورغم ذلك نادرا وقوع حوادث تصادم تؤدي الي الموت بعكس ما يحدث في مصر اليوم واللي المناخ فيها حار جاف صيفا ومعتدل شتاءاً
والسواقة في طرقاتها أسهل بكتير من السواقة في السويد ، ورغم ذلك بنسمع للأسف عن حوداث موت صعبة للغاية بنفقد فيها أحبائنا واقاربنا وأصدقائنا في كل محافظات مصر ، طب أية السبب في قلة حوداث الطرق بالسويد وانعدامها وكثرة حوداث الموت في مصر بالشكل الرهيب ده ؟!
الاجابة تتلخص في : قوة المنظومة في النظام المروري بمعني :
١-السويد لديها بنية تحتية حديثة للطرق ( متواجدة ببعض المناطق في مصر )
٢- جودة السيارات وصيانتها كل عام ( غير متواجد )
٣- النقطة الأهم السويد لديها نظام صارم جداً في الحصول علي رخصة القيادة السويدية körkort وهو الأصعب في العالم ومن اجل الحصول علي الرخصة لازم تمتحن اختبارين وتنجح فيهم ولو نجحت في اختبار وفشلت في التاني لن تحصل علي الرخصة ابدا
الاختبار الأول : دراسة نظري
والاختبار الثاني عملى
بسيارات اختبارات ده غير اختبار التلج (كورس تزحلق السيارة علي الثلج عشان تعرف كيف تتعامل اذا تعرضت سيارتك لحادث انزالاق)
المهم الاختبار النظري لازم تذاكر كتاب وتحضر فيه محاضرات كأنك بتدرس في الجامعة بالظبط وتفهم أكتر من ألف سؤال وبعد كدة تدخل الامتحان وتجاوب علي 50 سؤال و لأزم اجاباتك تكون صحيحة بنسبة ٦٠% حتى تجتاز الاختبار بنجاح .
وفي الاختبار العملي للرخصة يخرج معك مراقب بيكون بجوارك في سيارة اختبارات لمدة نصف ساعة حتى يرى شخصيتك ومدي انضباطك في الطريق ، وهل تحترم السرعات وتفهم إشارات المرور؟
هل تلتزم بالحارة المخصصة للسياقة والزاوية الميتة ؟ وهل تعرف تعمل باركينج لسيارتك من كل الجوانب أم لا .. بعد الاختبار العملي إذا كانت سواقتك صح المراقب سينجحك وستحصل علي الرخصة ولو سواقتك سيئة ستسقط في الاختبار وتعود للحجز للامتحان من أول وجديد ..
الصعوبة الكبيرة اللي الدولة السويدية عاملها للحصول علي الرخصة السويدية هو أهم شيئ في نجاح :
قوة المنظومة في نظام المرور .
للأسف الناس في مصر مش بيعرفوا يسوقوا سياراتهم صح ..!!! وده سبب كل الحوادث التى نسمع عنها اليوم ، الناس فاكرين أن السواقة بسرعة عالية فهلوة أو أنك تتخطي السيارات وتكسر عليها تبقي شطارة منك عدم الالتزام بحارتك المرورية والمشي عكس الاتجاة وعدم درايتك بالزاوية الميتة وغيره كل ده بيتسبب بحوادث الموت سواء ليك أو لغيرك
اعتقد الحل الوحيد لوقف نزيف الدماء في الطرقات المصرية هو إعادة الدولة اختبارات رخصة السواقة للسائقين من أول وجديد ( اختبار نظري وعملي ) للتأكد من كفاءتهم في السواقة، والحصول علي رخصة السواقة بعد التأكد من أهلية السائق ومدى قدرته علي القيادة
أقول هذا الكلام لأني اعرف ناس كتير واخدين الرخصة بالفلوس وبالواسطة والناس دي كانت سبب في حوادث الموت اللي بتحدث اليوم علي الطرقات وفيه منهم توفوا للأسف نتيجة عدم مقدرتهم على القيادة بشكل صحيح .
رحم الله الجميع وربنا يحفظ حياة كل شخص وينجيه من حوادث الطرقات
مايكل عزيز
