جريدة الأهرام الجديد الكندية 
مقالات مشابهة
1- الراجل ما بيتسألش تحب تاكل إيه .. و بإجماع العلماء الراجل مستعد يحفر نفق في جبل جرانيت باستخدام الشوكة والسكينة .. و لا إنه يتسأل تحب تتغدي ايه بكرة .. الراجل يتحط قدامه الأكل و ياكل في سلام.
2- الرجل بطبعه فاقد الاحساس بالزمن .. و التخطيط الاستراتيجي طويل الأجل بالنسبة له التفكير في الوجبة القادمة .. و ساعات بيكسل يعمل كده كمان.
3- زي ما الست بتبقي “عايزة ورد يا إبراهيم” الراجل بيبقي عايز: ” A little personal space يا زينب”.
4- الشاي بتاع الصحيان من نوم العصرية من مقدسات الرجل .
5- الراجل إللي بيأخد باله من تغيير نوع البرفان ده راجل معدل وراثيا مش أصلي .. الراجل الأصلي مش بيشم أصلاً.
6- المثل الإنجليزي بيقول “الرجل الجوعان هو رجل غضبان” .. أدينا حذرنا.
7- الراجل بيحب الأكل أكتر من أي حاجة في الدنيا .. أكتر من الستات و العربيات والفلوس والمنصب .. المنافس الوحيد للأكل هو النوم.
8- أكاد أجزم إن كل الشرور و الآثام إللي في الدنيا سببها الأصلي راجل إتسأل و هوه لسه صاحي من النوم حنأكل أيه أو اتطلب منه فلوس.
9- الرجالة وهمه في الـ personal space يا زينب بيبقوا طرش .. بالمعني الحرفي للكلمة .. لو عايزة حاجة تروحي بالراحة جدا و تتسللي من وراء العبيد إللي واقفين يهووا بمراوح ريش نعام جنبه .. و تفتحي كانزاية البيبسي المشبرة .. و تصبي بالراحة في كوبايته المفضلة من غير ما تتكلمي .. و تخرفشي بكيس اللب السوبر في نعومة و تفضي نصه في طبق صيني عشان يعمل صوت .. و تجيبي طبق كبير يرمي فيه القشر عشان ما يتعبش
وهوه بيتف .. و بعدين بعدها بساعة تسأليه علي الحاجة اللي إنتي عايزاها هيرد من أول مرة.
10- الستات بتعرف تفوق بنسبة 100% بعد الصحيان بعشر دقايق .. الراجل في جميع مراحل نموه من ساعة ما يصحي من النوم و لحد ما يوصل الحضانة أو المدرسة أو الجامعة أو الشغل .. و لمدة ساعتين تلاتة بيبقي مرشوش عليه بيروسول .. بس بكمية لا تكفي لقتله .. بصوا علي أي راجل ماشي علي رجله أو راكب مواصلات أو سايق عربية الصبح .. ذبابة تتعافي جزئيا من رشة مبيد حشري.
11- دور البرد بيسحب الحياة و الطاقه من الرجالة زي الكريبتونايت بتاع سوبر مان بالظبط.
12- الغالبية العظمي من الرجالة خُرس .. و اللي بيتكلم مش بيتكلم في البيت .. أي محاولة لتغيير مجري الطبيعة حتؤدي إلي كوارث.
13- في أي زمان و مكان و مهما كانت درجة تعقيد المشاكل مفيش حاجة ممكن تمنع الراجل إنه يبتسم قدام طبق بطاطس ملظلظة محمرة في الزيت او طبق فروت سلاط لطيف.
14- الراجل إللي بيسلك بلاعة مسدودة .. أو بيغير لمبة محروقة .. او بيصلح حاجه في البيت .. ده إنسان بكل ما تحمله الكلمة من معني
15- الرجالة ما بتتكلمش بعد الأكل.
16- تغيير مكان المحفظة أو الدبلة أو النضارة أو الساعه أو الموبايل بالنسبة للراجل ده مشروع قومي .. بيتم بالتعاون مع اليونسكو .. فما بالك بتغيير مكان دولاب أو كرسي أو كنبة .. عايزة الراجل يقعد لك في البيت ما تشيليش حاجة من مطرحها و هو موجود.
17- الكوليسترول و الدهون جزء أساسي من مكونات خلايا الراجل .. فبلاش الكلام الجارح بتاع الكرش و الريجيم عشان مش ناقصة سم بدن.
18- عايزة تعرفي الراجل بيحبك قد إيه خليه جاي من بره .. و مش شايف قدامه .. و حطيله الأكل .. و مع أول لقمة في بوقه قولي له عملت إيه في موضوع كذا إللي كلمتك فيه من كام يوم .. لو فضلتي عايشة يبقي بيموت فيكي و ده غالبا إللي بيحصل .. لو لا قدر الله السؤال طلع إنه القشة اللي قصمت ظهر البعير .. يبقي يا ريت الموضوع يقف على الطرد بس .. أو عاهة مستديمة.
19- بالنسبة للراجل المصري فيه فجوة زمنية غير محسوبة من ساعات الخليقة إسمها صباح الجمعة .. إقتراحات الفطار بره و التمشية والشوبينج و الكلام ده تعمليه مع صحباتك .. الفترة من ليل الخميس حتي ظهر الجمعة إعتبري الراجل فيها في رحلة روحانية تصوفية لإكتشاف الذات زي الوقوف قدام الثلاجة بالظبط.
20- رجالة الجيل ده بالذات مش حيعمروا كتير .. إلحقي أقعدي معاه و كفاية هري و طلبات عشان تطولي عمره الإفتراضي شوية.. هوه أصلا كده كده بره الضمان
رب المجد يسوع المسيح رأس الجسد( الكنيسة) والرجل رأس المرأة. احترموا عقول القراء يا أخوان كفاكم مواضيع سخيفة؟؟؟