جريدة الأهرام الجديد الكندية 
مقالات مشابهة
لأول مرة تتحدث زوجة أحمد الشناوى المسجون بالسعودية والمحكوم عليه بالسجن لمدة 25 سنة من المحكمة الجزئية والمؤيد من محكمة الاستئناف تلك القضية التى انفردت بنشرها الأهرام واعلنت تبنيها
حديث زوجة أحمد الشناوى
السلام عليكم ورحمة الله وبركاته أنا زوجة أحمد الشناوي المحكوم عليه ظلماً بخمسة وعشرين سنة سجن بالسعودية
قضية زوجي من أغرب القضايا اللى ممكن أي حد يسمع عنها ولأن القضية مازالت بالمحكمة العليا حتكلم باختصار فى الموضوع
زوجي يعمل مخلص جمركي في السعودية له تسع سنين تقريبا بالسعودية جاء له شخص اسمه أبو فهد
طلب منه يخلص له شحنة نشاء قادمة من الأردن، فخلصها له ودخلت السعودية بالفعل ، ودي كانت الشحنة الأولى ومفيش فيها أي ممنوعات.
وبعد دخول الشحنة الأولى، جاء أبو فهد وطلب من زوجي يخلص له ورق شحنة نشاء ثانية وزوجي بحكم عمله كمخلص جمركي قام بانهاء اوراق الشحنة الثانية بنفس الطريقة، وكان متبقي لزوجي عند أبو فهد أتعاب التخليص الجمركي وقيمتها 5000 ريال.
وحينما دخلت الشحنة الثانية الجمرك اكتشفت الشرطة إن بداخلها حبوب كبتاجون فكان من الضرورى القبض على أبو فهد صاحب الشحنة، لكنهم حينما فشلوا فى ذلك لأنه اختفى واغلق جواله .
في الوقت ده زوجي في الرياض والشحنة اللي فيها المخدرات في منطقة الحديثة على حدود الأردن، وفي نفس الوقت زوجي له فلوس عند أبو فهد اللي الشرطة معرفتش تقبض عليه حتى اليوم
فبدل ما يبحثوا على أبو فهد التاجر صاحب البضاعة، خلوا السواق اللي معه شحنة النشاء يتوسل لأحمد زوجي ويطلب منه يستلم الشحنة فاتصل السواق بزوجي بعلم الشرطة السعودية ، وقال لزوجي تعالى استلم البضاعة علشان تأخذ باقي فلوسك، زوجي رفض وقال له فلوسي عند أبو فهد ومليش دعوة بيك ولا بالبضاعة انشاء الله تكبها في الشارع ولما يظهر أبو فهد هعرف اخد اتعاب التخليص منه .
وبضغط من الشرطة ومن السواق على زوجي أحمد الشناوي قام السواق كذب على زوجي وقاله أرجوك عندي حالة وفاة نزل البضاعة في أي حتة ولما يظهر أبو فهد اعطيها له وبترتيب من الشرطة مع السواق عملوا كمين لزوجي وقبضوا عليه من غير ما يستلم الشحنة ومن غير ما يعرف هو اتقبض عليه ليه.
أقسم بالله زوجي برئ، وميعرفش أي حاجة، وده مش كلامي ده كلام ورق القضية وكلام النيابة لزوجي.
زوجي مفيش ضده دليل ادانة واحد ومحكوم عليه بأغلب الظن، والحكم 25 سنة تأييد في الاستئناف وحاليا المحامي كتب نقض وقدمناه،
زوجي ميعرفش أي حاجة عن البضاعة، واطمئن لأبو فهد لما دخلت الشحنة الأولى، وليس من أولويات عمل المخلص الجمركي أنه يفتش في البضاعة اللى جاية
ده شغل الجمارك والشرطة ولو البضاعة فيها ممنوعات كان لازم يقبضوا على صاحب البضاعة مش على المخلص الجمركي.
احنا واثقين إن المحكمة العليا زي ما أظهرت براءة المهندس علي أبو القاسم هتظهر براءة زوجي
وواثقين في نزاهة وعدالة القضاء السعودي، وعارفين إن لو فيه خطأ في قضية معينة هيتصلح علشان هما ناس بيخافوا ربنا ويحكموا بالشريعة وفوق كل ده احنا واثقين في عدالة ربنا وأن ربنا مش بيرضى بالظلم.
أنا حابه أوصل صوتي لرئيس الجمهورية ( أنا بنتك يا ريس زوجها مظلوم اقف جنبه)
عاوزة أوصل صوتي لوزيرة الهجرة ( لو سمحتي يا سيادة الوزيرة ساعدي زوجي واقفي جنبه
عاوزة أوصل صوتي للنائب العام وإدارة التعاون الدولي بقوله يا سيادة النائب العام ابنك أحمد مخلص جمركي شال قضية مخدرات لوحده ، وأصحاب البضاعة اللي باع واللي اشترى خارج السجن
وزوجي حكم عليه ب 25 سنة
عاوزه أوصل صوتي لوزير الخارجية بقوله لو سمحت أرجوك أطلب من اى شخص بالسفارة المصرية بالسعودية بمتابعة قضية زوجي مع المحامي المسئول عنها انتم السند للمصريين فى الغربة
ورسالتى للإعلاميين الأستاذ طارق علام زوجي برئ يا أستاذ طارق، وحضرتك تبنيت قضية المهندس علي وأظهرت براءته وإن شاء الله معتمدين علي الله ثم عليك تتبني قضية زوجي وتظهر برائته
يا أستاذ نصر القوصي حضرتك تبنيت قضية المهندس علي وتبنيت قضية زوجي وإن شاء الله تظهر البراءة وتبشرنا زي ما بشرت المهندس علي.
يا مصريين جوه وبره مصر ساندونا وادعمونا وادعوا لزوجي علشان هو برئ، وعلشاني وعلشان أطفاله وعلشان والده الراجل الكبير.
وربنا كبير وأكبر من أي ظالم، ولا حول ولا قوة إلا بالله العظيم
