جريدة الأهرام الجديد الكندية 
مقالات مشابهة
شوية اسئلة و ردود أيه اللى ودى أمريكا أوكرانيا تحط اسلحة ؟
حضرتك محدش راح أوكرانيا ولا حط أسلحة وكل القصة أن اوكرانيا دولة مستقلة عن الاتحاد السوفيتى
وشافت أطماع بوتين فى اراضيها و أنه طول الوقت بيسخن مجموعات انفصالية فقررت تنضم لحلف الناتو تمهيدا للانضمام للاتحاد الاوروبى “معلومة عالماشى نفس الخطوة اخدتها تركيا قبل طلب الانضمام للاتحاد الاوروبى اللى اترفض”
بوتين بيدافع عن أمن بلده معترضين ليه ؟
محدش أعترض على أمن بوتين وروسيا القومى القصة ببساطة أن أوكرانيا دولة مستقلة لها رئيس وجيش
وبرلمان و حدود آمنة مستقرة ولو كل حد قوى هيدخل دولة مستقلة عشان امنه القومى يبقى هتلر مكنش غلط
وانجلترا وفرنسا مكنوش غلط فى الاحتلال للدول لأن اقتصادهم أمن قومى لهم.
بس أنت دافعت عن امنك القومى فى ليبيا معترض ليه دلوقت؟
ببساطة ليبيا مش دولة ولا جيش ولا برلمان و شرق وغرب وجنوب و ميليشيات وفى وضع اللا دولة لكن لو هى فى وضع الدولة مكتملة الأركان حضرتك ولا تقدر تبصلها والدليل أننا مش قادرين نضرب السد عشان منتجاوزش الشرعية الدولية ولا هاجمنا السودان لما كان بيحكمها البشير ، وكانت متحالفة مع اثيوبيا.
بس أمريكا الشيطان الأعظم و بتدعم الإرهاب وروسيا هى اللى تقدر تقفلها ليه نعارضها ؟
ألان خطاب أمريكا الشيطان الأعظم ده خطاب الاعلام العروبى والغرب ضدنا ده كذب و أظن الكل شاف انهم فضلوا يشتموا فى تركيا فى الاعلام العربى و مضوا معاهم و فضلوا يشتموا إسرائيل و طبعوا معاهم و بيشتموا الغرب
وأمريكا ويتعاملوا معاهم و مطلوب من حضرتك تكره اللى هما عايزينك تكرهه .
و روسيا غرقانة فى أوكرانيا فى أول اسبوع و فاشلة فشل ذريع تفتكر هتقدر تتصدى لأمريكا وهى مش قادرة تحسم فى اوكرانيا ، يا صديقى روسيا مش قطب ولا حتى سنيد للصين .
ليه بتكره روسيا و تحب أمريكا ؟
أنا بكره روسيا لانها دولة قمعية غاشمة بتغزو جيرانها وارجع للى حصل فى جورجيا واليوم أوكرانيا وبكرا الله اعلم فين يمكن تشوف ان مصر بتهدد امنها القومى و تغزونا محدش يعرف ولا يضمن دول بيفكروا ازاىمبحبش بعد بلدى اى بلد تانية و شايف ان مصلحة مصر مش مع الروس الاغبياء لكن مصلحة بلدى فى تحالف الغرب اللى بيملك ٧٠% من اقتصاد الكوكب و نماذجه متميزة فى كل المجالات و نقدر نستفيد منهم بما يناسب حالتنا
ودلوقتى سؤال لحضرتك هل تقبل ان حد فى العالم يبرر غزو جيران لك لأنك أخذت قرارات هما شايفنها تهديد لامنهم القومى ؟
لو تقبل يبقى نمسح الحدود و نفرط فى الارض و نلغى الاتفاقيات و القانون الدولى .
